Yoʻl qurilish va taʼmirlash sohasidagi mexanizmlarni yaxshilashga qaratilgan Prezident qarori qabul qilindi. Unga koʻra, yoʻl qurilishi va taʼmirlash ishlari boʻyicha huquqbuzarliklarni aniqlashda yordam bergan fuqarolar moddiy ragʻbatlantirilishi belgilab qoʻyildi.

Bunda, ruxsatnoma olmasdan yoʻl qurilishi ishlarini amalga oshirgan yoki yoʻlning avvalgi holatini tiklash boʻyicha majburiyatini bajarmaganlarni aniqlashda faol yordam berganlarga undirilgan jarimaning 50 foizi miqdorida mukofot puli beriladi.

Hududlar qiyofasini yaxshilash maqsadida tajriba tarzida 2024-yilning 1-sentyabridan 2025-yilning 1-sentyabrigacha joylarda hokimlar belgilab beradigan muayyan hududda tegishli chora-tadbirlar amalga oshiriladi.

Xususan, fuqarolar va yuridik shaxslarning ularga tegishli bino va inshootga tutash hududlarni obodonlashtirish borasidagi masʼuliyati ommaviy axborot vositalari va ijtimoiy tarmoqlar orqali har bir mahallada mahalla raislari tomonidan tushuntirib boriladi.

Koʻp qavatli uylar hovlisi va uning atrofi, yoʻl hamda koʻcha chetlarining obodonlashtirilgan namunaviy koʻrinishi, shuningdek, yoʻl va koʻcha chetlaridagi boʻsh yerlarni koʻkalamzorlashtirish boʻyicha dastur tasdiqlanadi.