Bugun, 10-iyul kuni Prezident Shavkat Mirziyoyev byudjet mablagʻlaridan foydalanilishi ustidan moliyaviy nazoratni kuchaytirish boʻyicha takliflar taqdimoti bilan tanishdi. Bu haqda davlat rahbarining matbuot xizmati xabar berdi.

Qayd etilishicha, hozirda byudjet xarajatlari ustidan moliyaviy nazorat Hisob palatasi tomondian olib borilib, tizimda faqat byudjet va maqsadli jamgʻarmalar xarajati tashqi audit bilan qamrab olingan. Bu jami xarajatlarning 86 foizini tashkil etadi.

Shu sababli Hisob palatasi tomonidan konsolidatsiyalashgan byudjet ijrosini tashqi auditdan oʻtkazish taklif etilmoqda. Bu byudjetdan tashqari jamgʻarmalar hamda tashqi qarz hisobidan xarajatlarni ham qamrab olish imkonini beradi.

Hisob palatasi faoliyatida davlat dasturlaridagi milliy maqsad va vazifalarga erishishda yuzaga kelishi mumkin boʻlgan xavflarni baholashga qaratilgan strategik audit hamda davlat tashkilotlaridagi dasturiy taʼminotlar samaradorligi boʻyicha axborot texnologiyalari auditi joriy etilishi moʻljallanmoqda.

Maʼlumki, Oʻzbekistonda ayni paytda 30 mingga yaqin byudjet tashkiloti va davlat korxonalari boʻlib, ularni joyiga chiqib oʻrganishga koʻp vaqt va mablagʻ talab etiladi. Shuning uchun Hisob palatasida “Masofaviy nazorat markazi” ishga tushirilgan. Endi ilgʻor xorijiy tajriba asosida 36 ta risk-tahlil mezoni va indikatorini takomillashtirish zarurligi taʼkidlandi.

Shuningdek, hududlar rivoji uchun yoʻnaltirilayotgan mablagʻlar muhoakamasi asosan viloyat yoki tuman byudjeti bilan cheklanayotgani taʼkidlandi. Bu har bir hududga barcha manbalardan berilayotgan mablagʻlarning 65-70 foizi mahalliy kengashlarning nazoratidan chetda qolayapti, demakdir.

Shu bois Hisob palatasi byudjet jarayonini nafaqat Oliy Majlis palatalarida, balki mahalliy kengashlarda ham muhokama qilib borishi kerakligi qayd etildi.