Malayziya kompaniyasi O’zbekistonda dron ishlab chiqaradi
Malayziyaning “Meraque Group” kompaniyasi O‘zbekistonda qishloq xo‘jaligida foydalaniladigan dronlar ishlab chiqarishni rejalashtirmoqda. Kompaniya buning uchun 4,7 mln AQSh dollari sarmoya kiritishi va 1000 ta ish o‘rniga ega ishlab chiqarish korxonasini qurishi kutilmoqda.
Malayziyaning “Meraque Group” kompaniyasi O‘zbekistonda qishloq xo‘jaligi uchun dronlar ishlab chiqarishni yo‘lga qo‘yadi. Bu haqda Qishloq xo‘jaligi vazirligi axborot xizmati xabar berdi.
Ma’lum qilinishicha, bu borada Qishloq xo‘jaligi vazirligi va “Meraque Group” kompaniyasi o‘rtasida o‘zaro anglashuv memorandumi imzolangan. Kompaniya kelgusi uch yil ichida O‘zbekistonda 1000 ta ish o‘rni yaratib, 100 ming gektar qishloq xo‘jaligi yerlariga xizmat ko‘rsatuvchi ishlab chiqarish korxonasini tashkil etadi. Buning uchun 20 million Malayziya ringgiti yoki 4,7 million AQSh dollari ajratilishi ko‘zda tutilgan.
Kompaniya mintaqani texnologik jihatdan rivojlantirish uchun yana 7,1 million dollar ajratishni rejalashtirgan. O‘zaro hamkorlikning asosiy qismi sifatida O‘zbekiston qishloq xo‘jaligi tizimida dronlar ekotizimini yaratish maqsadi belgilab olingan. Bu orqali 100 mingdan ortiq fermerning faoliyati samaradorligi oshishi kutilmoqda.
Bundan tashqari, dronlardan foydalanishni qo‘llab-quvvatlash uchun o‘qitish va bilim almashishga e‘tibor qaratiladi.
