Миграция агентлиги Россияда вақтинча ишлаш учун рухсатнома олишга тайёрловчи платформани ишга туширди.

Россияда патент олишнинг асосий шартларидан бири рус тили, РФ тарихи ва қонунчилигига оид тестлардан муваффақиятли ўтиш ҳисобланади. Платформа мамлакатда вақтинча меҳнат фаолиятини олиб бориш истагида бўлган фуқароларга имтиҳонларга тайёрланиш имконини беради.

Бунинг учун намунавий синов тестлари ишлаб чиқилган бўлиб, улар ёрдамида рус тили бўйича билимларни баҳолаш ҳамда имтиҳон саволлари билан танишиш мумкин. Хусусан, платформада қуйидагилар бўйича тест намуналари келтирилган:

• эшитиб тушуниш;
• ўқиш ва ёзиш;
• лексика ва грамматика;
• Россия тарихи;
• Россия қонунчилиги асослари.

Олти босқичли тестлардан ўтгач, фойдаланувчиларга тўғри жавоблар тақдим этилади. Бундан ташқари, тест натижалари асосида қайта тайёргарлик кўриш мумкин бўлади.

Платформадан ушбу ҳавола орқали бепул фойдаланиш мумкин.

Аввалроқ агентлик директори Беҳзод Мусаев Россия Меҳнат бандлик федерал агентлиги (Роструд) раҳбари Михаил Иванков билан учрашувда мигрантлар учун рухсатномалар олиш тартибини Ўзбекистон ҳудудига ўтказиш масаласини ишлаб чиқишни тезлаштиришга келишганди. Шунингдек, патент учун тўлов иш берувчи ҳисобидан қопланиши режалаштирилмоқда. Рус тилидан имтиҳонни ҳам Тошкентда топшириш мумкин бўлади.