Вазирлар Маҳкамасининг «Ёқилғи-энергетика ресурслари истеъмолчиларини қўллаб-қувватлаш мақсадида 2024-2025 йилларда ёқилғи-энергетика ресурслари нархларининг босқичма-босқич ўзгариш графигига ўзгартишлар ва қўшимча киритиш ҳақида» 194-сон қарори қабул қилинди, деб хабар беради Энергетика вазирлиги.

Қайд этилишича, давлат раҳбарининг топшириғига мувофиқ ишлаб чиқилган мазкур қарор билан Вазирлар Маҳкамасининг 2024 йил 16 апрелдаги 204-сон қарори билан тасдиқланган 2024-2025 йилларда ёқилғи-энергетика ресурслари нархларининг босқичма-босқич ўзгариш графигига аҳоли учун енгиллик яратадиган ўзгартишлар киритилмоқда.

Масалан, ёқилғи-энергетика ресурслари нархларининг ошиши муддати 1 апрелдан 1 май санасига кўчирилди.

Қолаверса, 201 kWhдан 1000 kWhгача бўлган дифференциаллашган тариф бўйича истеъмол миқдори орасига янги миқдор киритилмоқда. Яъни 2025 йил 1 майдан эътиборан аҳоли истеъмолчилари 201 kWhдан 500 kWhгача бўлган янги миқдор оралиғида ҳар бир kWh учун 800 сўмдан тўлайди (шу пайтгача 201 kWhдан 1000 kWhгача бўлган қисми учун 1000 сўмдан ҳақ тўланган).

Таъкидланишича, бир ойда ўртача 500 kWh миқдорида электр энергияси сарфлайдиган хонадон вакиллари бунинг учун 2025 йилнинг 1 май санасига қадар 360 минг сўм тўларди (200 kWh базавий норма учун 90 минг сўм, 201 kWhдан 500 kWh учун 270 минг сўм). Тариф ўзгаришларидан сўнг бир ойда ўртача 500 kWh ток ишлатадиган хонадон бунинг учун 360 минг сўм тўлайди (200 kWh базавий норма учун 120 минг сўм, 201 kWhдан 500 kWh учун 240 минг сўм). Яъни улар учун нарх ошаётгани йўқ.

Бундан ташқари, қарор билан электр энергияси ва табиий газ нархлари ҳар йили 1 майдан бир маротаба йиллик инфляция даражасидан келиб чиққан ҳолда 10 фоиздан юқори бўлмаган миқдорда индексация қилиб борилиши белгиланмоқда.