Президент раислигида маҳаллий саноатни ривожлантириш бўйича келгусидаги устувор вазифалар юзасидан видеоселектор йиғилиши ўтказилли.

Унда 2024 йилда заргарликда ишлаб чиқариш 200 млн доллардан ошгани, экспорт 17 фоизга ўсиб, 92 млн долларга етгани таъкидланди. Мамлакатда йилига 100 тоннадан зиёд олтин қазиб олинаётгани билан имкониятларнинг ўндан бири ҳам ишга солинмаётгани қайд этилди.

Соҳада «хуфиёна» иқтисодиёт улуши юқори экани кўрсатиб ўтилди. Йилига 550−600 млн долларлик буюмлар норасмий тилла бозорларида айланмоқда, мустақил изловчилар 2020 йилда 40 кг олтин топширган бўлса, ўтган йили бу 100 баробар камайган.

Давлат раҳбари соҳани «соя»дан чиқариш учун якка тартибдаги тадбиркорларга ҳам тилла буюмлари билан савдо қилишга рухсат бериш бўйича билдирилган таклифни маъқуллади. Мутасаддиларга жойлардаги норасмий заргарлик расталарини замонавий кўринишга келтириб, уларнинг фаолиятини қонунийлаштириш топширилди.

Заргарликда миллий бренд яратиш учун хориждан дизайнер, технолог, қимматбаҳо тошлар билан ишлайдиган геммологларни олиб келиш харажатининг 2,5 минг долларгача қисми қоплаб берилади. Бунда заргарлар камида 5 нафар шогирд чиқариши шарт.

Заргарликда ҳам саноат усулига ўтиб, ички бозорни ҳимоя қилиш ва миллий брендларни қўллаб-қувватлаш вақти келгани қайд этилди. Бунинг учун заргарлик саноатида ишлатиладиган ускуналар ва уларни бутловчи қисмлари импорт божидан озод қилинади.

НКМК ва ОКМКдан олтинни бўлиб тўлаш асосида сотиб олиш тартиби яна 3 йилга узайтирилади. Жорий йилда биржага чиқариладиган олтин ҳажми 6 тоннадан 8 тоннага оширилади.

Нуфузли брендлар билан ҳамкорликни йўлга қўйиб, уларнинг дизайни ва қолипини олиб келиш харажатининг 30 минг долларгача қисми қоплаб берилади.

Хорижий тажриба асосида Яккасарой тумани, Андижон ва Хивада очилган заргарлик марказлари мамлакат бўйича барпо қилиниши белгиланди. Мутасаддиларга жорий йилнинг ўзида хомашё, лаборатория, ўқув маркази, шоу-рум ва дўконлари бир жойда бўлган яна 6 та марказни ишга тушириш, хорижий дизайнер ва технологларни жалб қилиб, заргарларни ўқитиш топширилди.

Янги заргарлик марказлари ишга тушган Тошкент шаҳри, Андижон ва Хоразмда, бу йил бундай марказлар очилиши режа қилинган Бухоро, Наманган, Самарқанд ва Фарғона вилоятларида ҳамда қолган ҳудудларда эҳтиёждан келиб чиқиб олтин захираси яратилади.

«Очиқ айтиш керак, тартиб-интизом, шаффоф тизим бўлмаган соҳада «катта сакраш» қилиб бўлмайди. Шунча шароитдан кейин ҳам «соя»да ишлаётганларга нисбатан қонун устуворлиги таъминланади», — деди президент.

Асиллик инспекцияси Солиқ қўмитаси ва Бош прокуратура билан биргаликда заргарлик соҳасида қатъий назорат ўрнатиши шартлиги кўрсатиб ўтилди. Тадбиркорлар заргарлик буюмини Асиллик инспекциясидан тамғалатиб, кирим қилишига бир ой вақт берилади.

Мутасаддиларга соҳани чуқур таҳлил қилиб, «хомашё — ишлаб чиқариш — савдо» занжиридаги барча иштирокчиларни «соя»дан чиқиб ишлашини рағбатлантирадиган тизим ишлаб чиқиш топширилди.