Ўзбекистон август ойида 2 тонна олтин сотиб олди, шунга қарамай, олтин сотишда дунё бўйича етакчиликни сақлаб қолмоқда. Бу ҳақда Жаҳон олтин кенгаши хабар берди.

Август ойида еттита мамлакат марказий банклари ўз олтин захираларини 1 тоннадан кўпроққа оширди.

Шу жумладан, Ўзбекистон Марказий банки август ойида 2 тонна олтин харид қилди. Бироқ йил бошидан буён мамлакат олтин-валюта захираларида олтиннинг физик ҳажми 17 тоннага камайиб, 366 тоннани ташкил этди. Шу нуқтаи назардан, Ўзбекистон олтин сотишда дунё бўйича етакчилик мақомини сақлаб қолмоқда.

Августда дунё бўйича қимматбаҳо металлнинг энг йирик харидори Қозоғистон бўлиб, у кетма-кет олтинчи ой 8 тонна олтин сотиб олди. Натижада Қозоғистон Миллий банкининг олтин захираси 316 тоннага етди — бу 2024 йил охирига нисбатан 32 тонна кўп.

Қолган давлатлар, жумладан, Болгария, Туркия, Хитой, Чехия ва Гана 2 тоннадан олтин харид қилди. Қимматбаҳо металлнинг ягона сотувчилари Россия ва Индонезия банклари бўлиб, улар мос равишда 3 ва 2 тонна олтин сотди. WGC Россиянинг олтин захиралари қисқаришини унинг танга зарб қилиш дастури билан боғлиқ бўлиши мумкинлигини тахмин қилди.

Июнь ойида Ўзбекистон Марказий банки 9 тонна олтин харид қилган, бу билан 4 ойлик сотувлар сериясига якун ясаб, дунёдаги энг кўп олтин сотиб олган мамлакат бўлганди.

Миллий статистика қўмитаси маълумотларига кўра, 2025 йилнинг январь август ойларида Ўзбекистон 8,42 млрд долларлик олтин сотди — бу ўтган йилнинг шу даврига нисбатан (4,99 млрд доллар) пул кўринишида 68,9 фоизга кўп. Бу даврда олтин етказиб бериш 2023 йилдаги тарихий максимал кўрсаткични (8,15 млрд доллар) ортда қолдирди. Бу — 2024 йилгидан (7,48 млрд доллар) ҳам юқори кўрсаткич.