Сурхондарё вилоятида ҳаво ҳароратининг кескин кўтарилиши муносабати билан оғир юк автомобилларининг ҳаракатига вақтинчалик чеклов жорий этилади. Бу ҳақда вилоят ҳокимлиги маълум қилди.

Қайд этилишича, вилоятда кундузи ҳаво ҳарорати 42−44 даражагача, айрим ҳудудларда эса ундан ҳам юқори даражага кўтарилмоқда. Бундай шароитда асфальт қопламаси 70−80 даражагача қизиб, йўлларнинг юк кўтариш қобилияти пасаяди.

Натижада оғир юк транспорти ҳаракати йўл қопламасида ғилдирак излари, деформация ва бошқа шикастланишларни юзага келтириши мумкин.

Шу сабабли Термиз шаҳри, туман марказлари ҳамда уларни боғловчи умумий фойдаланишдаги автомобиль йўлларида оғир юк автомобилларининг ҳаракати ҳар куни соат 10:00 дан 19:00 гача вақтинча чекланади.

Ҳокимлик ҳайдовчилар ва юк ташувчи корхоналарни юк ташиш вақтларини мазкур чекловларни инобатга олган ҳолда режалаштиришга ҳамда белгиланган талабларга риоя этишга чақирди.

Қайд этилишича, чеклов автомобиль йўлларини муддатидан олдин шикастланишдан сақлаш, ҳаракат хавфсизлигини таъминлаш ва йўл инфратузилмасининг хизмат муддатини узайтириш мақсадида жорий этилган.