Ўзбекистонда фильм суратга оладиган хорижий компанияларга харажатларининг 25 фоизигача қайтариб берилади
Хорижий кинокомпанияларга Ўзбекистон ҳудудида фильм яратиш билан боғлиқ харажатларининг бир қисмини қоплаб бериш тартиби тасдиқланди.
Ҳукуматнинг тегишли қарори билан «Хорижий кинокомпанияларнинг Ўзбекистон Республикаси ҳудудида ўз фильмларини яратиш билан боғлиқ харажатларининг бир қисмини қайтариш тартиби тўғрисида»ги низом қабул қилинди.
Ҳужжат хорижий кинокомпанияларга rebate тизими орқали Ўзбекистонда фильм ишлаб чиқариш жараёнида сарфланган маблағларнинг бир қисмини қайтариш тартибини белгилайди.
Rebate — халқаро амалиётда киноиндустрияни ривожлантириш ва хорижий лойиҳаларни жалб қилиш учун қўлланиладиган механизм ҳисобланади. Унга кўра, давлат фильм яратувчилар мамлакат ҳудудида амалга оширган харажатларнинг маълум қисмини қайтариб беради.
Низомга кўра, қоплаб бериладиган маблағ миқдори харажатлар ҳажмига қараб белгиланади:
- 3 млрд сўмгача бўлган харажатлар учун — 10 фоиз;
- 3 млрд сўмдан 5 млрд сўмгача — 15 фоиз;
- 5 млрд сўмдан 10 млрд сўмгача — 20 фоиз;
- 10 млрд сўмдан ортиқ харажатлар учун — 25 фоиз.
Бироқ битта фильм учун қайтариладиган маблағ 4 млрд сўмдан ошмаслиги белгиланган.
Дастурда иштирок этиш учун хорижий кинокомпания белгиланган платформа орқали электрон ариза юборади.
Ўзбекистон ҳудудида тасвирга олиш ишлари якунлангач, компания амалга оширилган харажатларни тасдиқловчи ҳужжатларни 60 кун ичида платформага киритиши керак.
Комиссия харажатларнинг rebate дастури талабларига мувофиқлигини 15 иш куни ичида кўриб чиқиб, тегишли хулоса беради. Ижобий қарор қабул қилинса, харажатларнинг бир қисми 5 иш куни ичида хорижий кинокомпания ҳисобварағига ўтказиб берилади.
