Марказий банк 2025 йил учун молиявий барқарорлик шарҳини эълон қилди. Унда уй хўжаликлари секторидаги қарз юки, кредит кўрсаткичлари ва молиявий хавфлар таҳлил қилинган.

Маълум қилинишича, 2025 йилда аҳолининг умумий қарз юки пасайган. Бунга аҳоли даромадларининг ошиши ҳамда қарз олувчиларга нисбатан макропруденциал талабларнинг кучайтирилиши таъсир қилган.

Хусусан, банклардан кредит олган аҳолининг ўртача DSTI кўрсаткичи 38 фоиздан 37 фоизга тушган. Ушбу кўрсаткич қарзга хизмат кўрсатиш харажатларининг даромадга нисбатини ифодалайди, яъни аҳоли даромадининг қанча қисми кредит тўловларига йўналтирилаётганини кўрсатади.

Ипотека кредитлари бўйича ўртача DSTI 49 фоизни ташкил этган. Автокредитлар бўйича эса мазкур кўрсаткич 60 фоиздан 37 фоизгача камайган. Шунингдек, ипотека кредитлари бўйича ўртача LTV кўрсаткичи 76 фоиз, автокредитлар бўйича эса 73 фоиз бўлган. LTV кредит суммасининг гаров қийматига нисбатини кўрсатади.

Марказий банк микроқарзлар сегменти алоҳида эътибор талаб қилишини таъкидлади. Маълумотларга кўра, микроқарзлар бўйича ўртача DSTI кўрсаткичи 37 фоиздан 40 фоизга ошган. Микроқарз олувчилар сони қарийб 2,7 миллион кишига етган.

Шу билан бирга, битта қарздорга тўғри келадиган микроқарз шартномалари сони 1,7 тадан 1,9 тага кўпайган. Микроқарзлар қолдиғи 48,8 триллион сўмни ташкил этиб, умумий кредит портфелининг 8 фоизига тенг бўлган.

Марказий банкка кўра, аҳолининг умумий қарз юки камайганига қарамай, микроқарзлар бозоридаги фаоллик ва қарз юкининг ортиши ушбу сегментда кредит сифати ҳамда аҳолининг тўлов қобилиятини доимий кузатиб боришни талаб қилади.