Коррупцияга қарши курашиш агентлиги томонидан Давлат органи ёки ташкилотида меҳнат шартномаси тугатилган ёки хизматдан бўшатилган ходимни ўзи назоратни амалга оширган ташкилотларга ишга қабул қилишда коррупцияга қарши ички назорат бўлинмасидан хулоса олиш тартиби тўғрисидаги низом тасдиқланди. Ҳужжат уч ойдан кейин кучга киради.

«Манфаатлар тўқнашуви тўғрисида»ги қонунга мувофиқ, агар ходим давлат органи ёки ташкилотида ишлаган бўлса, ишдан бўшатилгандан кейин 2 йил ичида у илгари назорат қилган ташкилотга ишга қабул қилинишидан олдин унинг аввалги иш жойи бўйича коррупцияга қарши ички назорат бўлинмасининг хулосаси олиниши шарт.

Бунда, агар назорат остидаги ташкилот собиқ давлат хизматчисини ишга қабул қилмоқчи бўлса, кадрлар бўлинмаси 1 иш куни ичида ички назорат бўлинмасига сўровнома юборади.

Ички назорат бўлинмаси коррупцияга қарши хавфни баҳолайди, унинг натижалари бўйича қуйидаги хулоса турларидан бирини бериши мумкин: ижобий, шартли ижобий (муайян чекловлар билан қабул қилиш) ёки салбий.

Хулоса бўлмаган ёки салбий хулоса олинган тақдирда номзодни ишга қабул қилиш тақиқланади.

Шартли ижобий хулоса берилганда, ходим 3 ой давомида қарор қабул қилишда иштирок этмайди, манфаатлар тўқнашувига йўл қўймаслик учун унинг лавозим вазифалари қайта тақсимланади, шунингдек, унинг фаолияти ички назорат хизмати томонидан назорат қилинади.

Ҳужжат Қонун ҳужжатлари маълумотлари миллий базасида эълон қилинган ва 10.10.2026 йилдан кучга киради.