Ўзбекистонда ноқонуний кўп қаватли уйлар қурганлик учун 5 йилгача қамоқ жазоси жорий этилмоқда
Сенат қурилиш соҳасида назоратни кучайтиришга қаратилган қонунни маъқуллади. Энди инспекция рухсатисиз кўп квартирали уй қурган фуқаролар 400 БҲМ, мансабдор шахслар эса 450 БҲМ миқдорида жаримага тортилади. Агар қоидабузарлик такроран содир этилса, 3 йилдан 5 йилгача озодликдан маҳрум қилиш жазоси қўлланади.
Олий Мажлис Сенати қурилиш соҳасида давлат назорати ва бошқарувини такомиллаштиришга қаратилган қонунни маъқуллади. Ҳужжат инспекция рухсатисиз кўп квартирали уйлар қурганлик учун йирик жарималар ҳамда такроран содир этилган ҳолатлар учун жиноий жавобгарликни жорий этади.
Сенатнинг Бюджет ва иқтисодий масалалар қўмитаси раиси ўринбосари Қобул Турсунов маълум қилишича, 2017–2025 йилларда жами 11 834 та кўп квартирали уйнинг зилзилабардошлиги хатловдан ўтказилган. Ўрганишлар давомида 3 107 та уйнинг лойиҳа-смета ҳужжатлари давлат экспертизасидан ўтмагани, улар ўрнига хусусий экспертиза хулосаси олингани аниқланган. Шунингдек, 1 434 та объект назорат инспекциясида рўйхатдан ўтмаган, 185 та ҳолатда эса биноларга ноқонуний қўшимча қаватлар қурилган.
Сенаторнинг таъкидлашича, 2025 йил 1 июлдан ўзбошимчалик билан қурилган бино ва иншоотларни назорат инспекциясида рўйхатдан ўтказиш амалиёти тўхтатилганига қарамай, ноқонуний қурилишлар сони яна 213 тага ошган.
Қонунга мувофиқ, Қурилиш ва уй-жой коммунал хўжалиги соҳасида назорат қилиш инспекциясининг рухсатисиз кўп квартирали уй қурган фуқароларга 400 БҲМ (164,8 млн сўм), мансабдор шахсларга эса 450 БҲМ (185,4 млн сўм) миқдорида жарима белгиланмоқда.
Шунингдек, Жиноят кодексига киритилаётган ўзгартишларга кўра, мазкур қоидабузарлик маъмурий жазо қўлланилганидан кейин такроран содир этилса, айбдорларга 3 йилдан 5 йилгача озодликдан маҳрум қилиш жазоси қўлланади.
