«Ўзбекнефтгаз» АЖ бошқаруви 2026 йилнинг биринчи ярим йиллик натижалари ҳамда кейинги даврдаги устувор вазифаларга бағишланган йиғилиш ўтказди.

Унда айрим ишлаб чиқариш кўрсаткичлари, жумладан, дизель ёқилғиси ва мазут ишлаб чиқариш ҳажмлари режаси бажарилмагани муҳокама қилинди.

Компания маълумотига кўра, бунга дунёдаги геосиёсий вазият туфайли хомашё импортида юзага келган чекловлар таъсир қилган. Масъулларга ҳолатни таҳлил қилиш, сабабларни ўрганиш ва йил якунига қадар белгиланган кўрсаткичларга эришиш бўйича вазифалар берилди.

Шу билан бирга, йиғилишда 2026 йил бошидан тизим корхоналарининг молиявий фаолияти ва бошқарув механизмлари қайта кўриб чиқилгани маълум қилинди. Асосий эътибор даромадлиликни ошириш, харажатларни қисқартириш ва молиявий интизомни кучайтиришга қаратилган.

Натижада компаниянинг қарз юки 2025 йил якунидаги 3,1 баробардан 2,7 баробаргача пасайтирилди. Аввалги йилларда жалб қилинган юқори фоизли кредитларни қайта молиялаштириш ва муддатидан олдин сўндириш орқали фоиз тўловларидан 219 млрд сўм тежалди.

Шунингдек, дебитор қарздорлик йил бошига нисбатан 1,2 трлн сўмга камайтирилди. Ойлик иш ҳақлари оширилганига қарамай, харажатлар режага нисбатан 1 трлн сўмга оптималлаштирилди.

Йиғилишда куз-қиш мавсумига тайёргарлик масаласи ҳам кўриб чиқилди. Ишлаб чиқариш объектларининг узлуксиз ишлашини таъминлаш, ёқилғи-мойлаш материаллари ва автобензин захираларини шакллантириш бўйича чораларни жадаллаштириш топширилди.

Бундан ташқари, компаниянинг 14 та нефть базаси 2025 йил биринчи ярим йиллигини 36,5 млрд сўм зарар билан якунлаган бўлса, жорий йилнинг шу даврида 5,4 млрд сўм соф фойдага чиққан. Бу даврда 250 минг тонна автобензин ва 114 минг тонна дизель ёқилғиси реализация қилинган.

Шунингдек, Хитой компаниялари иштирокидаги инвестиция лойиҳаларини тезлаштириш, газ қазиб чиқариш кўрсаткичларини ошириш ва мавжуд қудуқларни қайта ишга тушириш бўйича топшириқлар берилди.