Қорақалпоғистондаги махсус майнинг зонаси резидентларини рўйхатдан ўтказиш тартиби белгиланди
Фақат ҳудудда рўйхатдан ўтган юридик шахслар резидент бўлиши мумкин. Майнинг учун ягона электр тармоғидан фойдаланишга рухсат берилади, бироқ электр тўлови икки баробар оширилган тариф асосида ҳисобланади.
Адлия вазирлиги «Besqala Mining Valley» махсус майнинг зонаси резидентларини рўйхатдан ўтказиш ва уларнинг фаолиятини амалга ошириш тартиби тўғрисидаги низомни давлат рўйхатидан ўтказди.
Ҳужжатга кўра, махсус майнинг зонаси Қорақалпоғистон Республикасининг бутун ҳудудини қамраб олади. Ушбу ҳудудда юридик шахсларни махсус зона резиденти сифатида рўйхатдан ўтказиш ҳамда уларнинг фаолият юритиш тартиби белгиланди.
Махсус зона резиденти бўлиш учун юридик шахс Қорақалпоғистон ҳудудида давлат рўйхатидан ўтган ва шу ерда фаолият олиб бораётган бўлиши керак.
Резидент сифатида рўйхатдан ўтиш учун берилган аризани кўриб чиқишда йиғим ундирилмайди. Рўйхатдан ўтказиш ёки рад этиш тўғрисидаги қарор ариза топширилган кундан бошлаб 30 кун ичида қабул қилинади.
Шунингдек, махсус зона ҳудудида майнинг фаолиятини амалга ошириш учун ягона электр энергетика тизимидан олинадиган электр энергиясидан фойдаланишга рухсат этилади.
Бунда истеъмол қилинган электр энергияси учун тўловлар белгиланган тарифга нисбатан икки баробар оширилган коэффициент асосида ҳисобланади.
