Олий Мажлис Сенати «Тошкент халқаро молия маркази тўғрисида»ги конституциявий қонунни такомиллаштиришлардан сўнг маъқуллади. Ҳужжат халқаро капитални жалб қилиш, инвестиция муҳитини яхшилаш ва замонавий молия инфратузилмасини шакллантиришга қаратилган.

Қонунга кўра, марказ ҳудудида банк ва инвестиция фаолияти, суғурта, қимматли қоғозлар бозори, тўлов тизимлари, ислом молияси, финтех, аудит, консалтинг ва бошқа хизматлар учун алоҳида ҳуқуқий режим жорий этилади.

Марказ иштирокчилари учун солиқ ва бошқа имтиёзлар, шунингдек, хорижий инвесторлар ва мутахассислар учун енгилликлар назарда тутилган. Жумладан, иштирокчилар хорижий мутахассисларни қўшимча рухсатномасиз ишга қабул қилиши, молия марказига алоқадор чет эл фуқаролари эса беш йилгача муддатга виза олиши мумкин бўлади.

Шунингдек, қонун билан Тошкент халқаро тижорат судини ташкил этиш белгиланмоқда. Унинг ваколатлари, суд юрисдикцияси ҳамда судьяларни танлаш мезонлари халқаро стандартлар асосида шакллантирилади.

Сенатор Эркин Гадоевнинг таъкидлашича, ҳужжатни қайта ишлаш жараёнида солиқ ва виза имтиёзларидан фойдаланиш шартлари, минимал инвестиция талаблари, маблағларнинг келиб чиқиши ҳамда инвесторларни ҳимоя қилиш механизмлари аниқлаштирилган.

Дастлабки ҳисоб-китобларга кўра, Тошкент халқаро молия маркази 2030 йилга бориб ҳар йили мамлакат иқтисодиётига 20−25 млрд доллар инвестиция жалб қилиши ва ЯИМга камида 1 фоиз ҳисса қўшиши мумкин.