Ўтган июнь ойида Тошкент шаҳрида товар ва хизматлар нархи энг тез ўсди. Бу ҳақда Марказий банк маълумот берди.

Ҳудудлар кесимида сезилган инфляция

Ўтказилган сўров натижаларига кўра, ой давомида аҳолига сезилган инфляция даражаси ўртача 10,2 фоиз бўлди. Бу майдагига нисбатан 0,1 фоизга паст.

Маълумот учун, келтирилаётган рақамлар йиллик инфляцияни ифодалайди. Яъни бунда 2025 йил июндан 2026 йил июни якунигача бўлган даврдаги нархлар ошиши инобатга олинган.

Энг юқори сезилган инфляция Тошкент шаҳрида кузатилиб, 12,3 фоизни ташкил этгани билдирилган. Яна бир қанча ҳудудларда ўртачадан юқори нархлар ўсиши қайд этилган. Жумладан, Андижон (12,2 фоиз), Фарғона (11,1 фоиз), Самарқанд (10,7 фоиз), Сурхондарё (10,4 фоиз), Тошкент (10,4 фоиз) вилоятларида инфляция суръати нисбатан тез деб баҳоланган.

Энг паст сезилган инфляция даражаси Хоразм вилоятида қайд этилган — 8,5 фоиз.

Гўшт нархи энг юқори

Жорий йил июнида ҳам нархи энг юқори маҳсулот сифатида гўшт биринчиликда турибди. Бир ой ичида ёнилғи, электр ва газ нархи ошганини билдирганлар улуши кўпайган. Айниқса, гуруч қимматлашганини қайд этганлар сони кескин ортган.

Шакар ва қандолат қиймати кўтарилганини билдирганлар ҳам нисбатан кўпчиликни ташкил этган.

Инфляцияни сердаромадлар кучлироқ сезди

Даромади 4 миллион сўмдан юқори бўлган аҳолининг сезилган инфляция даражаси нисбатан юқори шаклланган. Нархлар ошиши энг юқори (13,5 фоиз) сезилган тоифа 30 миллион сўмдан юқори даромад олувчилар бўлган.

Ойига 20-30 миллион сўм орасида топадиганлар эса инфляция даражаси 12,4 фоиз атрофида сезилганини билдирган. Энг паст (8 фоиз) даражада сезилган инфляция ойига 2 миллион сўмгача даромад топадиганлар чўнтагида кузатилган.

Соҳалар кесимида сезиларли нарх ўсишлари

Июнда маиший хизмат вакилларида сезилган инфляция даражаси энг юқори бўлди — 11,6 фоиз. Шу билан бирга, ташиш хизматлари (11,6 фоиз), қурилиш (11,5 фоиз), тиббиёт (11,4 фоиз) ходимлари нархлар ўсиши ўртачадан кўпроқ бўлганини қайд этган.
Энг паст даражада сезилган инфляция даражаси талабаларда бўлган — 8,8 фоиз.