Ўзбекистонда энг фаол 200 та маҳаллага 2 миллиард сўмдан мукофот берилади. Бу ҳақда президент Шавкат Мирзиёев 16 июль куни ўтказилаётган йиғилишда маълум қилди.

Йиғилишда қайд этилишича, июнь ойидаги қабул қилинган қарорларга асосан, маҳаллада қоладиган ер ва мол-мулк солиғининг улуши 10 фоиздан 15 фоизга оширилган. Шунингдек, санитария қоидаларини бузганлик ва ноқонуний қурилиш учун қўлланиладиган жарималарнинг 10 фоизи маҳаллага тушади. Эндиликда маҳалладаги нотурар объектлардан тушган ер ва мулк солиғининг 5 фоизи ҳам маҳалланинг ўзида қолдирилади.

Шу билан бирга, 5 минг квадрат метргача бўлган бўш биноларни маҳалланинг ўзи сотувга чиқаришига рухсат берилди. Бунинг ҳисобидан маҳаллалар бюджетига яна 405 миллиард сўм келиб тушади.

Йил давомида энг кўп тадбиркорларни рўйхатга олган, энг кўп янги иш ўрни яратган, тушум даражаси энг юқори бўлган ва энг кўп қўшимча солиқ базаси топган 200 та маҳаллага 2 миллиард сўмдан мукофот пули ажратилади.

Умуман олганда, янги ташаббуслар ҳисобига маҳаллалар бюджетига тушум жорий йилда 1 триллион 600 миллиард сўмга, келаси йилдан бошлаб эса 2 триллион сўмга етиши кутилмоқда.

Аввалроқ Ўзбекистонда “маҳалла еттилиги”га 10 миллион сўмдан грант ажратилгани ҳақида хабар берилганди.