1 октябрдан ЯИДХПда фуқаролар ўз номига расмийлаштирилган барча телефон рақамлари ва банк карталарини кўриши мумкин бўлади. Бу 15 июлда қабул қилинган президент қарорида назарда тутилган.

Хусусан, фуқаролар телефон рақамини муайян муддатга нофаол ҳолатга ўтказиш учун ариза бериши, кейин эса уни қайта фаоллаштириши мумкин бўлади. Шунингдек, портал орқали фойдаланилмаётган телефон рақамига хизмат кўрсатишни тўхтатиш имконияти ҳам яратилади.

Бундан ташқари, ЯИДХПда муайян телефон рақамига уланган пуллик хизматлар ҳақидаги маълумотлар ҳам тақдим этилади.

Банк карталарига оид қисмда эса портал орқали карта эмитенти бўлган банкка картани блоклаш ёки ёпиш ҳақида ариза юбориш мумкин бўлади. Бунда операция фуқаронинг электрон мурожаати асосида картани чиқарган банк томонидан амалга оширилади.

Қарор билан тасдиқланган чора-тадбирлар режасида мазкур хизматларни кўрсатиш бўйича маъмурий регламентларни ишлаб чиқиш назарда тутилган. Ҳукумат қарорлари лойиҳалари август ойида тайёрланиши, сервисларни ишга тушириш бўйича амалий чоралар эса 2026 йил сентябрь ойида қабул қилиниши белгиланган.

Виртуал карта

1 сентябрдан ЯИДХПда тижорат банкларининг виртуал тўлов карталарини жорий этиш ҳам режалаштирилган. Фойдаланувчи унга ўзининг амалдаги банк картасини бириктириши ва давлат хизматлари учун портал орқали тўловларни амалга оширишда фойдаланиши мумкин бўлади.

Виртуал картани очиш, уни тўлдириш, шунингдек, унда қолган маблағни фойдаланувчининг бошқа банк картасига ўтказиш учун комиссия ундирилмайди.

Ҳужжатда, шунингдек, қуйидаги маблағларни автоматик равишда қайтариш назарда тутилган:

• ортиқча ёки нотўғри тўланган маблағлар;
• асоссиз рад этилган давлат хизмати учун тўланган маблағлар;
• кечиктирилган хизмат учун амалга оширилган тўловлар.

Бу маблағлар фуқаронинг виртуал тўлов картасига алоҳида ариза топшириш талаб этилмаган ҳолда қайтарилади.

Май ойида Шавкат Мирзиёев давлат хизматлари соҳасида бюрократияни қисқартиришга қаратилган чора-тадбирларни маъқуллаган эди. Ўша пайтда Ўзбекистонда 1041 та давлат хизмати мавжуд бўлиб, уларнинг 80 фоизи онлайн кўрсатилар, бироқ тизимда ортиқча тартиб-таомиллар ва такрорланувчи талаблар сақланиб қолган эди. 2030 йилга қадар 783 та хизматда «ноль бюрократия» тамойилини жорий этиш, 550 та хизматни электрон шаклга, яна 80 тасини проактив ва композит форматга ўтказиш, 80 та хизмат кўрсатиш муддатини ўртача 13 кундан 6 кунга қисқартириш ҳамда 25 турдаги хизматлар бўйича тўловларни камайтириш режалаштирилган. Бу аҳолига ҳар йили давлат идораларига қатнаш харажатларидан 35 млрд сўмгача, йиғимлар қисқариши ҳисобига эса 851 млрд сўмгача маблағни тежаш имконини бериши кутилмоқда.