Тошкент аэропорти ўз тарихида биринчи марта расмий споттинг ўтказди
Споттингда 15 нафар споттер иштирок этди
Тошкент аэропортида илк маротаба «Кузги споттинг» (самолётларни суратга олиш) тадбири бўлиб ўтди. Бу ҳақда компания матбуот хизмати хабар берди.
Қайд этилишича, споттерлар аэропортнинг замонавий қисми, турли авиакомпаниялар, перрон, замонавий хизмат кўрсатиш ускуналари, багаж тизими ва самолётларнинг учиш-қўниш жараёнини суратга олиш имконига эга бўлган. Бундан ташқари, меҳмонлар яқин келажакда йўловчилар учун очилиши кутилаётган янги чиқиш зали бўйлаб экскурция ўтказган.
«Бу воқеа, эҳтимол, узоқ вақт олдин содир бўлиши керак эди. Бироқ, кўпгина ҳолатлар туфайли аэропорт журналист, блогер ва, албатта, споттерлар учун ёпиқ объект эди. Лекин ҳамма нарса ўзгаради. Мен Ўзбекистонда биринчи расмий споттинг ўтказишни таклиф қилганимда нима учун бундай бўлиши керак эмас, деб ўйлагандим. Барча хавфсизлик чораларига риоя қилиш билан, албатта, споттинг ўтказиш мумкин. Бутун дунёда бу оддий амалиёт», — дейди Uzbekistan Airports бошқаруви раиси Раъно Жўраева.
Ўзбекистондаги биринчи споттинг 15 та авиафотографни ўзида жамлади. Хабарга кўра, Uzbekistan Airports компанияси бундай тадбирларни давом эттиришни, шунингдек, тадбирларга хорижий авиаташувчиларни иштирок этишга таклиф қилишни режалаштирмоқда.
Аввалроқ Малайзия авиакомпанияси Ўзбекистондаги аэропортларга қизиқиш билдиргани хабар қилинганди.
