Саудия Арабистони Қизил денгиз соҳилидан Табуккача 170 километр узунликдаги янги чизиқли шаҳар — The Line қурилишини бошлади. «Футуристик мегаполис ўзининг биринчи аҳолиси ва сайёҳларини 2024 йилдан қабул қила бошлайди», деди The Line қурилишининг бир қисми бўлган Neom лойиҳаси раҳбари Надми ан-Наср Bloomberg агентлигига берган интервьюсида.

Маълум қилинишича, ҳозир лойиҳа дастлабки босқичда ва шаҳарни режалаштириш ҳамда қуриш учун зарур бўлган барча ишларнинг «ҳатто 1 фоизи» ҳам бажарилмаган. Надми ан-Насрнинг сўзларига кўра, бошланган қурилиш ишлари асосан ер ости транспорт инфратузилмасини ётқизиш учун «қум ва тоғларни кўчириш»дан иборат.

Neom раҳбарининг қўшимча қилишича, 170 километрлик мегаполисни бир нуқтадан эмас, балки бир вақтнинг ўзида иккала четидан ҳам қуриш режалаштирилган. Унинг сўзларига кўра, объектда ҳозирданоқ 1500 дан ортиқ қурувчи ишлаб, яшаб келмоқда.

«Кейинги қадамлардан бири Neom’ни Саудия Арабистонининг қолган қисмидан фарқли қонунлар билан ‘эркин ҳудуд’ сифатида тартибга солувчи қоидаларни тасдиқлаш бўлиши мумкин», — деди Надми ан-Наср.

Саудия Арабистони валиаҳд шаҳзодаси Муҳаммад бин Салмон 2021 йил бошида келажакнинг чизиқли шаҳри дизайнини тақдим этди. Унинг сўзларига кўра, мегаполис қурилишига 500 миллиард доллар сарфланади. Шаҳарда йўллар ҳам, на машиналар ҳам бўлмайди: барча транспортлар ерости ва юқори тезликда ҳаракатланади. Ривожланган транспорт тизими сабаб шаҳарни бошидан охиригача 20 дақиқада кесиб ўтиш мумкин бўлади. The Line энергияни фақат қайта тикланадиган манбалардан олади.

The Line қурилиши Муҳаммад бин Салмон 2017 йилда эълон қилган янада улуғвор Neom лойиҳасининг бир қисмидир. Bloomberg агентлигининг ёзишича, Саудия шаҳзодаси Қизил денгизнинг шимоли-ғарбий соҳилидаги ҳудудни юқори технологиялар фойдасига нефть иқтисодиётини босқичма-босқич тугатиш, ижтимоий чекловларни юмшатиш ва хорижий сармояларни кўпайтириш ҳақидаги қарашларини ўзида мужассамлаштирган технологик марказга айлантириш ниятида.