Ўзбекистонда молиявий ночор, кам даромадли масжид имом-хатибларига «Вақф» фонди томонидан 2018 йилдан ҳозирга қадар 6 миллиард сўмдан зиёд маблағ маош сифатида тўланди. Бу ҳақда АОКАда бўлиб ўтган брифингда маълум қилинди.

Қайд этилишича, мамлакатда фаолият юритаётган молиявий ночор, кам даромадли масжид имом-хатиблари учун фонд томонидан 2018 йилдан узлуксиз ойлик маош тайинланиб, ўтган вақт мобайнида 6 миллиард 976 миллион сўмдан зиёд маблағлар маош сифатида тўлаб берилган.

Пандемия даврида республикамиздаги 2090 дан ортиқ масжидда меҳнат қилаётган имом-хатиб, имом ноиби, мутавалли, муаззин, қоровул ва бошқа техник ходимларнинг барчаларига моддий ёрдам учун 65 миллиард 873 миллион сўм хайрия сифатида ажратилган.

Умумий ҳисобда фонд ўз фаолиятини бошлагандан бугунга қадар жами 74 миллиард 944 миллион 873 минг сўм маблағни масжидлар қурилиши, таъмирланиши, техник таъминот ва ходимларни моддий қўллаб-қувватлаш учун хайрия сифатида йўналтирилган.

Аввалроқ Ўзбекистонда намунали маҳаллаларда фитнес кўчаларини яратиш учун 100 миллиард сўм ажратилгани ҳақида хабар берилганди.