Президент Шавкат Мирзиёев раислигида қишлоқ хўжалиги ерларини ижарага бериш, мева-сабзавотчилик кластерлари ва томорқа хўжаликлари фаолиятини янада ривожлантириш борасидаги устувор вазифалар юзасидан видеоселектор йиғилиши бошланди. Бу ҳақда Президент матбуот хизмати хабар берди.

Йиғилишда Президент қабул қилинган қарорлар билан пахта-тўқимачилик ва ғалла кластерлари фаолияти билан боғлиқ барча масалалар ҳал қилиб берилганини таъкидлади. Бунинг ҳисобига тўқимачилик саноати корхоналари экспорти 2021 йилда 3 миллиард доллардан, келгуси беш йилда эса 7 миллиард доллардан оширилиши қайд этилган.

«Мева-сабзавотчилик экспортини бугунги 1,2 миллиард доллардан камида 5 миллиард долларга кўпайтириш бўйича барча имкониятлар бор», — деган давлат раҳбари йиғилиш аввалида.

Шунингдек, 2022 йилда пахта ва ғалладан бўшаган 80 минг гектар ер аҳолига бўлиб берилиб, 70 минг гектар ер фойдаланишга қайтарилиши белгиланган. Бундан ташқари, аҳолининг ўзида 500 минг гектар атрофида томорқа ерлари мавжуд бўлиб, ушбу ерлардан қўшимча 10 миллион тонна маҳсулот олиш, 1,5 миллион аҳолини банд қилиш ва 800 миллион долларлик экспорт қилиш учун шароит яратилиши айтилди.

Аввалроқ Ўзбекистон 10 ойда мева-сабзавот экспортидан қанча даромад қилгани ҳақида хабар берилганди. Шкнингдек, Ўзбекистонда мева-сабзавот лойиҳаларига 100 миллион доллар ажратилиши хабар қилинди.