Шавкат Мирзиёев 30 ноябрь куни гидроэнергетика соҳасидаги лойиҳаларга оид тақдимот билан танишди. Бу ҳақда Президент матбуот хизмати хабар берди.

Маълум қилинишича, шу кунгача республика гидроэнергетика салоҳиятининг 50 фоизи ишга солинган, холос. Шу боис, энергия қувватини тўлиқ тасарруф этиш мақсадида жами 740 мегаватт қувватли 21 та йирик лойиҳа ишлаб чиқилган. Хусусан, 2022 йилда 170 мегаваттли 7 та, 2023–2024 йилларда 150 мегаваттли 12 та ҳамда 2025–2026 йилларда 420 мегаваттли 2 та лойиҳани амалга ошириш режалаштирилган.

Қайд этилишича, тақдимотда ушбу иншоотларни сифатли қуриш ва барқарор ишлашини таъминлаш бўйича кўрсатмалар берилган. Шунингдек, давлат раҳбари тўғон талаб этмайдиган кичик гидростанциялар қуриш масаласига алоҳида эътибор қаратиб, бунга хусусий секторни жалб қилиш кераклигини таъкидлади.

Хабарга кўра, 22 та шундай истиқболли майдон рўйхати шакллантирилган. Уларда қуввати 5 мегаваттгача бўлган мини гидро электр станциялар қуриш бўйича тендер эълон қилиниши белгиланган.

Шунингдек, Норин, Сўх, Танхоз, Оқ булоқ, Угам каби дарёлар ва каналларда 500 киловаттгача қувватга эга ихчам гидростанциялар ўрнатиш имконияти бор. Тадбирда бундай жойлар рўйхати аҳоли ва тадбиркорларга эълон қилиниши қайд этилган. Бунда қуёш, шамол электр станциялари ўрнатгани учун аҳоли ва тадбиркорларга қандай имтиёзлар берилган бўлса, кичик гидростанциялар учун ҳам шундай имтиёз ва субсидиялар қўлланилиши белгиланган.

Бундан ташқари, гидроиншоотларни ишлатиш учун малакали мутахассислар тайёрлаш масаласига ҳам тўхталиб ўтилган. Техника, ирригация ва архитектура йўналишидаги олий ўқув юртларида бунга алоҳида аҳамият қаратиш, уларда қурилиш ҳамда гидравлик лабораториялар ташкил этиш зарурлиги қайд этилган.

Аввалроқ Президент 2026 йилгача қуёш ва шамол электр станциялари қувватини 8 минг мегаваттга етказишни белгилаб бергани хабар қилинганди. Шунингдек, Президент «Буюк ипак йўли» бекатидан ТТЗгача бўлган ерости йўли лойиҳалари билан танишгани ҳақида хабар берилди.