Япония пойтахти Токиода Швециянинг IKEA компанияси ойига 0,86 долларга квартираларни ижарага беришни бошлади. Бу ҳақда компания сайтида хабар берилган.

Қайд этилишича, ушбу квартираларнинг ўлчами атиги 10 метр квадратни ташкил қилади. Квартиралар икки қаватли бўлиб, уларнинг ичида мини ётоқхона, иш майдони, кир ювиш машинаси, тўшак ва ҳатто ҳаммом ҳам мавжуд.

Бундай хонадонлар Токионинг Шинжуку ҳудудида ижарага берилади. Квартиралар ҳозирча фақат IKEA Family клуби аъзолари учун мавжуд ва ойига 99 ен ёки тахминан 0,86 долларни ташкил қилади.

Маълум бўлишича, IKEA Japan квартиралар ҳақида эълон бериш учун ўз уйлари тўғрисида кичик мини-сериални суратга олган. Унда BLÅHAJ кўчмас мулк акуласи бош қаҳрамонни ўйнаган.

Маълумот учун, ҳозирда Токиода 14 миллион аҳоли истиқомат қилмоқда, шу сабабли ҳар қандай кўчмас мулкка талаб жуда юқори. IKEA шу тарзда ҳатто кичкина квартираларда ҳам яхши яшаш мумкинлигини кўрсатишни мақсад қилган. IKEA квартиралари 2023 йил 15 январгача ижарага берилади.

Аввалроқ Ўзбекистонда талабалар билан тузилган кўчмас мулк ижара шартномаларини ҳам E-ijara интерактив хизматида ҳисобга қўйиш мумкин бўлгани ҳақида хабар берилганди.