Тошкент шаҳрида 8 декабрь куни Ўзбекистон раислигида «Италия-Марказий Осиё» шаклидаги иккинчи вазирлар конференцияси бўлиб ўтди. Бу ҳақда Ташқи ишлар вазирлиги матбуот хизмати хабар берди.

Маълум қилинишича, тадбирда Марказий Осиё мамлакатлари, Италия ва Европа Иттифоқи ташқи сиёсий идоралари раҳбарлари, иқтисодий ва молиявий тузилмалари, соғлиқни сақлаш муассасалари раҳбарлари ва вакиллари иштирок этган.

Қайд этилишича, делегациялар Марказий Осиё давлатлари ва Италия ўртасидаги ўзаро ҳамкорликнинг бугунги ҳолати ва истиқболларини муҳокама қилган, замонавий таҳдид ва хатарларга биргаликда жавоб бериш муҳимлигини таъкидлаган. Минтақадаги экологик муаммоларни ҳал этиш, экстремизм ва терроризм каби трансмиллий таҳдидларнинг олдини олиш, шунингдек, миллатлараро тотувлик, халқларнинг дўстлик ва қардошлик ришталарини мустаҳкамлаш йўллари таҳлил этилган.

Шунингдек, конференция сессиялари доирасида минтақавий иқтисодий шерикликни такомиллаштириш, савдо-инвестиция, транспорт ва транзит соҳаларида ўзаро ҳамкорлик самарадорлигини ошириш механизмлари кўриб чиқилган. Энергетика, агробизнес ва саноат ускуналари соҳасида қўшма лойиҳаларни амалга оширишга алоҳида эътибор қаратилган.

Бундан ташқари, пандемияга қарши курашиш ва унинг оқибатларини бартараф этиш чора-тадбирлари юзасидан фикр алмашган ҳолда соғлиқни сақлаш соҳасида ҳамкорликдаги саъй-ҳаракатларнинг устувор йўналишлари белгилаб олинган. Анжуман доирасида «Марказий Осиё ва Италия ўртасидаги илмий ҳамкорликнинг бугунги ҳолати ва ривожланиш истиқболлари» мавзусида давра суҳбати ҳам ташкил этилиб, унда Марказий Осиё ва Италиянинг етакчи экспертлари иштирок этган.

Иштирокчилар минтақавий бошқарувнинг концептуал моделлари, барқарор ва инклюзив ривожланиш, маданий меросни муҳофаза қилиш ва тарғиб қилиш, илмий ва академик алоқаларни фаоллаштириш масалалари юзасидан фикр алмашган.

Аввалроқ Ўзбекистон ва Тожикистон ишбилармонлари ўртасида бизнес форум ўтказилгани хабар қилинганди. Шунингдек, Иқтисодиёт вазири ўринбосари Европа Иттифоқи вакиллари билан «яшил» иқтисодиётга ўтишни муҳокама қилгани ҳақида хабар берилди.