2022 йилда меҳнат мигрантининг IТ-картаси паспортнинг ўрнини босиб, Россия Федерацияси ҳудудида шахсни тасдиқловчи ҳужжатга айланади. Бу ҳақда «Российская газета» хабар берди.

Россия муҳожирлар федерацияси (РМФ) президенти Вадим Коженов мамлакатнинг миграция сиёсатидаги ўзгаришлар ҳақида маълумот берган.

Унинг сўзларига кўра, Россия Федерациясида мигрантлар билан боғлиқ қонунчиликни ислоҳ қилиш якунланмоқда ва 2022 йилнинг ўрталарига қадар Давлат Думасига янги лойиҳа тақдим этилади.

«Йил охиригача, қонун қабул қилиниши билан биз мигрант учун рақамли IТ-картани жорий қиламиз», — дейди Коженов.

РМФ раҳбари янги IТ-карта бутун Россия бўйлаб 10 йил давомида амал қилишини, ишлаш учун патент эса меҳнат фаолияти амалга ошириладиган ҳудудга боғланганини қўшимча қилган.

Бундан ташқари, Коженов лойиҳа бўйича 10 йилдан сўнг, мигрантнинг IТ-картаси, агар унинг эгасида ҳеч қандай қоидабузарлик бўлмаса, чексиз бўлиб қолишига ваъда берган.

Шунингдек, Коженов ҳозирда мамлакатда иш берувчилар ва мигрантларнинг электрон реестрлари тайёрланаётганини маълум қилган. Иш берувчилар хорижликларни «рақамли» ёллашни тартибга солишлари керак.

Россия Ички ишлар вазирлиги маълумотларига кўра, 2021 йилда рўйхатга олинган хорижликлар сони сезиларли даражада ошган. Агар 2020 йилда 8,3 миллиондан ортиқ киши рўйхатга олинган бўлса, 2021 йилда уларнинг сони 10,6 миллион нафарга етган.

Аввалроқ Россияда меҳнат муҳожирлари ўртача қанча ойлик олиши ҳақида хабар берилганди.