Korzinka супермаркетлар тармоғи асосчиси Зафар Ҳошимов компаниясининг Маkro тармоғи билан ашаддий рақобатга киришишига ҳали анча борлигини таъкидлади. Бу ҳақда у «Ular» лойиҳасига берган интервьюсида айтиб ўтди.

Тадбиркорнинг таъкидлашича, у Маkro раҳбарияти билан касбий жиҳатдан яхши ва профессионал муносабатларга эга.

«Рақобатчиликка рақобат бор, лекин адоват йўқ. Бозорнинг ўзи ҳали кучли рақобат қиладиган даражага етиб келмаган. Ҳозирги кунда Makro билан бизни бирлаштирсангиз ҳам бу корхоналарнинг савдоси бутун бозорнинг 5-6 фоизига тўғри келади. Дейлик, катта денгизда 2 та кичкина кема чиқиб сув талашмайди-ку», — деган Зафар Ҳошимов. 

Тадбиркор бундан ташқари, Европа давлатлари, хусусан Францияда 92 фоиз аҳоли озиқ-овқатни супермаркетлардан сотиб олишини, яъни бу мамлакатлар бозорида ўсиш учун жой деярли қолмаганини қайд этган.

«Улар ўсса, 2 фоиз ўсар, балки. Бизда ҳамма супермаркетлар тармоқларини бирлаштириб ҳисоблаганда бу кўрсаткич 10 фоизга етмайди. Шунинг учун бир-бирини ёмон кўрадиган, ашаддий рақобатчиликка ҳали анча бор», — деган Korzinka асосчиси.

Маълумот учун, Korzinka супермаркетлар тармоғи фаолият олиб борадиган чакана савдо секторида Ўзбекистонда аҳоли жон бошига тўғри келувчи чакана савдо товар айланмаси 2020 йилда 5 миллион 828 минг 400 сўмни ташкил этган. Шунингдек, мазкур йилда чакана савдо товар айланмаси умумий ҳажми 199 триллион 518 миллиард 800 миллион сўмни ташкил этган.

Korzinka’нинг супермаркетлар тармоғи эса 1996 йилда фаолиятини бошлаган. Супермаркетлар бу номни олгунга қадар Angelsey Food номи билан ишлаб келган. Эски ном талаффуз қилишда қийин бўлгани, ҳар ким ўзи хоҳлагандек айтгани ҳамда шунга ўхшаш бошқа бир дўкон борлиги сабаб содда ва қулай бўлган Korzinka’га алмаштирилган. 2020 йил маълумотларига кўра, тармоқнинг 54 та дўкони мавжуд бўлиб, уларда 4300 нафар ҳодим ишлайди.

Аввалроқ Зафар Ҳошимов муваффақиятсиз бизнеси — «CityTaxi» тарихи ҳақида гапиргани ҳақида хабар берилганди.