Билл Гейтс инсоният иқлим муаммоларини қачон енгишини айтди
Миллиардернинг фонди Cleantech лойиҳаларига 15 млрд доллар сармоя киритмоқчи.
Билл Гейтс инсоният иқлим муаммоларини енгиши учун яна ўнтача «яшил» стартаплар керак бўлишини айтди. Бу ҳақда «Inc.» хабар берди.
Билл Гейтс сўнгги йилларда қанча иқлим технологиялари стартаплари ташкил этилганидан хурсанд. Бироқ, унинг фикрича, улардан фақат баъзиларигина дунёга ўзгаришлар киритиш учун етарлича узоқ давом этади.
«Бу [иқлим ўзгариши] билан шуғулланадиган компаниялар сони ҳақиқатан ҳам ҳайратланарли. Улардан баъзилари муваффақиятсиз бўлади. Уларнинг кўплари муваффақиятсиз бўлади. Буни енгиб ўтиш учун бизга бир неча ўнлаб стартап керак ва бу жараённи тезлаштиришимиз лозим», — деган Билл Гейтс Жаҳон иқтисодий форумининг виртуал сессиясида.
PwC томонидан эълон қилинган тадқиқотга кўра, 2013 йилдан 2021 йилнинг биринчи ярмигача бўлган даврда 3000 дан ортиқ иқлим технологиялари стартаплари ташкил этилган бўлиб, шу даврда умумий молиялаштириш 222 миллиард доллардан ортиқни ташкил қилган.
Таъкидланишича, Билл Гейтснинг Breakthrough Energy Catalyst жамғармаси Cleantech лойиҳаларига 15 миллиард доллар сармоя киритмоқчи. Собиқ тадбиркорнинг сўзларига кўра, иқлим ўзгаришига қарши курашга катта ҳисса қўшиш учун бир неча ўнлаб муваффақият ҳикоялари керак бўлади.
«Биласизми, Microsoft, Google, Amazon каби компаниялар бу [иқлим стартапи] майдонидан чиқади», — деган Гейтс октябрь ойида бўлиб ўтган SOSV Climate Tech Summit саммитида.
Қайд этилишича, Breakthrough Energy Catalyst фонди ҳавони тўғридан-тўғри тутиб олиш, яшил водород, энергияни узоқ муддатли сақлаш ва барқарор авиация ёқилғиси билан боғлиқ технологияларни молиялаштиришга қаратилган.
Форумда Гейтс дунёнинг баъзи бадавлат давлатларини, жумладан, АҚШни тозалаш технологияларини кенгайтириш орқали глобал муаммони ҳал қилишга ёрдам беришга чақирган.
Гейтснинг сўзларига кўра, иқлим ўзгаришининг олдини олиш учун қазиб олинадиган ёқилғиларга қарамликни бартараф этиш инсоният қилган энг қийин ишлардан бири бўлади, лекин бу шунга арзийди.
Аввалроқ Билл Гейтс COVID-19’дан ҳам хавфлироқ вируслардан огоҳлантиргани хабар қилинганди. Шунингдек, Билл Гейтс нефть гигантларининг қиймати пасайишини башорат қилгани ҳақида хабар берилди.
