Ford йўлтанламас Bronco’нинг пойга версиясини тақдим этди
Мижозлар учун автомобилнинг 50 та намунаси ишлаб чиқарилади
Ford компанияси йўлтанламас Bronco’нинг пойга учун ихтисослашган DR версиясини намойиш қилди. Бу ҳақда «Коммерсантъ» нашри хабар бермоқда.
Моделнинг рамка ва қисмлари стандарт Ford Bronco’дан олинган. Аммо шиша толали корпус пўлат рамка ва ўрнатилган рулонли қафас атрофида қурилган. Ford’нинг лойиҳадаги ҳамкори Канаданинг Multimatic пойга автомобиллари фирмасидир.
Bronco DR Multimatic DSSV амортизаторлари, янги ғилдираклар ва 37 дюймли BFGoodrich шиналари билан Multimatic суспензиясига эга. Йўлтанламас 400 от кучига эга 5 литрли V8 двигатель ҳамда 10 поғонали автомат узатмалар қутиси билан жиҳозланган. Салонда пойга ўриндиқлари ва телеметрия йиғиш модулига эга Motec рақамли асбоблар панели мавжуд.
Янги Ford Bronco DR 2022 йил Baja 1000 пойгасида Ford Performance жамоаси томонидан фойдаланилади. Мижозлар учун автомобилнинг 50 та намунаси ишлаб чиқарилади. Унинг нархи 200 минг доллардан ортиқ бўлиши кутилмоқда.
Аввалроқ Ford компанияси Ranger пикапининг янги авлоди қандай кўринишда бўлишини маълум қилганди.
