Келиб чиқиши украиналик бўлган тадбиркор Михаил Уотфорд (Михаил Толстошея) Буюк Британиянинг Суррей шаҳридаги уйида ўлик ҳолда топилди. Бу ҳақда The Guardian хабар бермоқда.

Қайд этилишича, маҳаллий полиция миллиардернинг ўлимини «тушунтириш имконсиз» деб ҳисобламоқда, бироқ ҳозирча ҳеч қандай шубҳали нарса аниқланмаган.

Уотфорднинг дўстларидан бири миллиардер Россия қуролли кучларининг Украинадаги махсус операциясидан жуда хавотирда эканини айтган. Ҳуқуқ-тартибот идоралари Уотфорднинг ўлими юзасидан тергов олиб бормоқда.

Маълумот ўрнида, Михаил Толстошея 1955 йилда Украинада туғилган. СССР парчаланганидан кейин у Буюк Британияга кўчиб ўтган ва у ерда фамилиясини Уотфордга ўзгартирган. Дастлаб у Лондонда яшаган, кейин Суррейга кўчиб ўтган. Уотфорд нефть ва газ сотиш билан шуғулланарди.

Аввалроқ Миллиардер Олег Тиньков Россиянинг Украинага босқинини қоралагани хабар қилинганди. Шунингдек, «Яндекс» раҳбари Аркадий Волож миллиардер мақомидан маҳрум бўлгани ҳақида хабар берилди.