Ўзбекистон ва Россия II Ҳудудлараро ҳамкорлик форумида 9 млрд долларлик битим имзолади
Икки мамлакат ҳудудлари маъмуриятлари истиқболли тармоқларда 75 та янги инвестиция лойиҳаси устида иш бошлаши маълум қилинди
Ўзбекистон Президентининг Россия Федерациясига ташрифи арафасида Москва шаҳрида бевосита ва онлайн шаклда Ўзбекистон ва Россия ўртасидаги II Ҳудудлараро ҳамкорлик форуми ўтказилди. Бу ҳақда Инвестициялар ва ташқи савдо вазирлиги матбуот хизмати хабар берди.
Маълум қилинишича, форум доирасида ўтказилган учрашув ва музокаралар якунида умумий қиймати 9 миллиард долларга тенг 600 та икки томонлама битим, жумладан, 7,4 миллиард долларлик 141 та инвестициявий лойиҳа ва 1,6 миллиард долларлик 455 та экспорт шартномаси имзолан.
Ўзбекистон Инвестициялар ва ташқи савдо вазирлиги ҳамда Россия Саноат ва савдо вазирлиги ўртасида ташкил этилган қўшма лойиҳа офиси инвестициявий лойиҳаларнинг амалга оширилишини тўлиқ кузатиб боради ва қўллаб-қувватлайди. Шунингдек, икки мамлакат ҳудудлари маъмуриятлари истиқболли тармоқларда 75 та янги инвестиция лойиҳаси устида иш бошлаши маълум қилинди.
Тадбир давомида металлургия, энергетика, кимё, электротехника, чарм-пойабзал, тўқимачилик ва фармацевтика саноати, сув хўжалиги, нефть-газ тармоғи ҳамда банк-молия соҳаси каби ҳамкорлик йўналишларида бир қатор келишувларга эришилган.
Аввалроқ Ўзбекистон ва Туркия ўртасидаги савдо айланмаси ҳажми 5 млрд долларга етказилиши ҳақида хабар берилганди.
