Ташкилий психолог ва Техасдаги A&M университети профессори Энтони Клотц 2021 йил май ойининг охирида Bloomberg агентлигига берган интервьюсида COVID-19 пандемияси туфайли ишдан бўшатиш тўлқинини башорат қилган эди. У ҳақ бўлиб чиқди. Меҳнат департаменти маълумотларига кўра, ноябрь ойида АҚШда рекорд даражадаги 4,5 миллион ходим ишдан бўшатилди. Клотц CNBC’га 2022 йилда қандай тенденцияларни кутиш мумкинлиги ҳақида сўзлаб берди.

1. Ишдан бўшатиш секинлашади

Клотцнинг фикрича, 2022 йил ишдан бўшатишлар камроқ бўлади. Кадрлар тақчиллиги туфайли меҳнат бозоридаги мураккаб вазият иш берувчиларни ходимларга янги имтиёзлар ва юқори маошлар таклиф қилишга мажбур қилган. Келгуси ойларда айнан мана шу нарса ходимларнинг «ҳайдалиб кетиши»нинг олдини олишга ёрдам беради.

2. Мослашувчан иш вақти истисно эмас, балки одатий ҳолга айланади

Хоҳлаган жойдан ишлаш имконияти энди ходимлар учун иш ҳақининг 10 фоизга ошиши каби қимматлидир.

«Раҳбарлар ўзларига шундай савол беришни бошлайди: қандай қилиб биз одамларга ўз жадваллари бўйича кўпроқ ваколат бера оламиз? Янада мослашувчан бўла оламизми?», — дейди Клотц.

Менежерлар ходимлар алмашинувини ташқи омилларга боғлайди: давлат, пандемия ёки ишсизлик нафақалари. Улар ходимларга кўпроқ мослашувчан иш шароитларини таклиф қилишдан бош тортади ва Клотцнинг сўзларига кўра, «буюк истеъфолар» даврида зарар кўрадиган «омадсизлар» бўлиб қолади. Клотц пандемия бу вазиятни ўзгартириши ва ходимлар қулайроқ иш муҳитига эга бўлишини кутмоқда.

3. Масофадан ишлаш янада рақобатбардош бўлади

АҚШдаги кўплаб компаниялар ишчи кучи топишда қийналаётгани сабабли, улар ишга олишни автоматлаштиради ва халқаро номзодларга иш таклиф қилади.

Клотцнинг прогноз қилишича, пандемиядан кейин ҳам компаниялар ишга ёллаш жараёнини тезлаштириш ва пулни тежаш учун роботлар ва сунъий интеллектга кўпроқ сармоя киритади.

«АҚШда масофадан туриб ишлаш имконияти учун рақобат кучаяди. Чунки америкалик иш берувчилар ходимларни камроқ маошга ёллашлари мумкин», — дея хулоса қилади профессор.

Аввалроқ тажрибасиз бўла туриб, янги соҳада иш топиш учун 5 та маслаҳат берилганди.