Давактив агентлиги давлат иштирокидаги корхоналарга эслатма билан чиқди
Давлат иштирокидаги корхоналарнинг бизнес-режалари 1 декабргача тасдиқланиши лозим
Ўзбекистонда қонунчилик талабларига кўра, давлат иштирокидаги корхоналарнинг 2022 йилга мўлжалланган бизнес-режаси уларнинг бошқарув органлари томонидан 2021 йилнинг 1 декабрига қадар тасдиқланиши лозим. Бу ҳақда Давлат активларини бошқариш агентлиги матбуот хизмати хабар берди.
Маълум қилинишича, 2022 йилга мўлжалланган самарали бизнес-режани ишлаб чиқишда давлат иштирокидаги корхоналарга кўмаклашиш, бизнес-режани ўз вақтида сифатли тайёрлаш мақсадида агентлик томонидан намунавий бизнес-режа лойиҳалари ишлаб чиқилган. Лойиҳалар методик қўлланма сифатида ишда фойдаланиш учун корхоналарга тақдим этилган.
Бунда давлат иштирокидаги корхоналарнинг фаолияти хусусиятларини инобатга олиб, уларга қулайлик яратиш учун бизнес-режалар намунаси уч тоифага бўлинган. Улар йирик корхоналар, кичик корхона ва микрофирмалар ҳамда бозорлар ва савдо комплекслари учун бизнес-режалардан иборат.
Таъкидланишича, корхоналар Вазирлар Маҳкамасининг 2020 йил 30 октябрдаги қарори 3-банди талаблари асосида иш кўришлари зарур. Унга кўра, давлат иштирокидаги корхоналар бизнес-режа кўрсаткичлари бажарилиши тўғрисидаги маълумотлар ва тегишли ҳужжатлар Давлат активларини бошқариш агентлигининг «Давлат мулки» ахборот тизимига (kpi.davaktiv.uz) тақдим этиб борилиши лозим.
Шунингдек, давлат иштирокидаги корхоналардан 2022 йилга мўлжалланган бизнес-режасини ўз вақтида, сифатли ишлаб чиқилишини ва белгиланган тартибда бошқарув органларида тасдиқлаган (маъқуллаган) бўлишлари керак. Унинг асосий кўрсаткичлари тўғрисидаги маълумотларни агентлик ахборот тизимида жойлаштириш чораларини кўриш сўралади.
Маълумот ўрнида, ҳозирда фаолият юритаётган давлат иштирокидаги корхоналар вазирлик ва идоралар кесимидаги рўйхатига ҳавола орқали ўтилади. Ўз навбатида, агентлиги бизнес-режаларни ишлаб чиқишда давлат иштирокидаги корхоналарга ҳар томонлама амалий ёрдам беришга тайёрлиги маълум қилинган.
Аввалроқ «Янгийўл ёғ-мой»нинг 56,32 фоиз давлат улуши сотувга қўйилгани хабар қилинганди. Шунингдек, Президент давлат активлари бўйича йиғилиш ўтказгани ҳақида хабар берилди.
