Tesla’нинг чораклик автомобиль етказиб бериш ҳажми икки йилда биринчи марта камайди
Таҳлилчилар иккинчи чоракда компания томонидан 261 181 та автомобиль етказиб берилишини башорат қилганди.
Tesla 2022 йилнинг иккинчи чорагида дунё бўйлаб 254 695 та автомобиль етказиб берди. Компания тақдим этган маълумотлар буни тасдиқлайди.
Иккинчи чоракда етказиб бериш ҳажми биринчи чоракка нисбатан 17,85 фоизга кам. Tesla январь-март ойларида мижозларга рекорд миқдордаги — 310 048 дона автомобиль етказиб берганди.
Кейинчалик компания кўрсаткичлари таҳлилчилар кутганидан ҳам ошиб кетди, бироқ Tesla бош директори Илон Маск биринчи чоракни «истисно ҳолатда қийин» деб таърифлади.
У компания етказиб бериш занжиридаги узилишлар ва Хитойнинг коронавирусга нисбатан «ноль бардошлик» сиёсати туфайли қийинчиликларга дуч келганини маълум қилди.
Bloomberg’нинг таъкидлашича, иккинчи чоракда етказиб бериш икки йил ичида биринчи марта камайди, бу даврда компания ҳар чоракда жўнатмаларни кўпайтирди.
Таҳлилчилар иккинчи чоракда компания томонидан 261 181 та автомобиль етказиб берилишини башорат қилганди.
Tesla маълумотларига кўра, 2021 йилнинг иккинчи чорагига нисбатан ўсиш ҳали ҳам 28,5 фоизни ташкил этади.
Tesla ўз баёнотида таъминот занжирларида ҳали ҳам қийинчиликларга дуч келаётгани ва компаниянинг хоҳишидан қатъий назар содир бўладиган заводларнинг ёпилишидан азият чекаётганини маълум қилди.
Бироқ компания 2022 йилнинг учинчи чораги — июнь ойида Tesla ўз тарихидаги энг юқори ишлаб чиқариш даражасига эришганини таъкидлади. Компания аниқ рақамларни ошкор қилмади.
Хабар берилишича, иккинчи чоракда ишлаб чиқариш Шанхайдаги Tesla заводи ишида юзага келган танаффус туфайли пасайган.
Коронавируснинг кенг кўламда тарқалиши туфайли шаҳар ҳокимияти қатъий карантин жорий қилди ва кўплаб корхоналар ўз фаолиятини тўхтатишга мажбур бўлди.