Туризм соҳасида хизмат кўрсатишга оид давлат стандартларига ўзгартириш киритилди
Тадбиркорлик субъектларидан жойлаштириш воситаларини давлат стандартларига мувофиқлаштириш талаб этилади.
Ўзбекистонда туризм соҳасида хизмат кўрсатишга оид давлат стандартларига ўзгартириш киритилди. Бу ҳақда Туризм ва спорт матбуот хизмати хабар берди.
Маълум қилинишича, жойлаштириш воситалари ва уларда тақдим этиладиган хизматларга доир умумий талабларни белгиловчи «Туризм хизматлари. Жойлаштириш воситалари. Умумий талаблар» ҳамда «Туризм хизматлари. Меҳмонхоналар ва ўхшаш жойлаштириш воситалари. Таснифлаш тизими» давлат стандартларига тегишли ҳукумат қарорларига мувофиқ ўзгартиришлар киритилган.
Жумладан, даволаш муассасаларига қўйилган талаблар енгиллаштирилган. Клиникалар ҳудуди атроф ўралиши ва қўриқланиши, юкларни сақлаш учун хона мавжуд бўлиши, вақтинчалик фойдаланиш учун инвентарьлар тақдим қилиш талаблари бекор қилинган.
Хусусан, «Ногиронлиги бўлган шахсларнинг ҳуқуқлари тўғрисида»ги қонуннинг 25-моддасига мувофиқ меҳмонхона ва ўхшаш жойлаштириш воситаларида ногиронлар учун шароитлари бўлган камида битта номернинг мавжуд бўлиши ҳамда номерни жиҳозлаш бўйича талаблар киритилган.
Шунингдек, Вазирлар Маҳкамасининг қарори билан «Коронавирус пандемияси ва глобал инқирозли ҳолатларнинг мамлакат туризм соҳасига салбий таъсирини камайтириш бўйича чора-тадбирлар режаси» тасдиқланган.
Унга мувофиқ, ташриф буюрувчиларга қулайлик яратиш ва улар хавфсизлигини таъминлаш мақсадида меҳмонхона ва ўхшаш жойлаштириш воситаларида электрон дастур билан интеграциялашган электрон калитли (пластик магнит карта) электрон қулфлар ва «Хавфсиз туризм» ва «Хавфсиз шаҳар» тизимлари, видеокузатув тизимларини жорий этиш талаби жорий қилинган. Мазкур талаблар 2022 йил 3 январдан бошлаб амалиётга татбиқ қилинган.
Бундан ташқари, меҳмонхоналарда мижозларга қўшимча қулайлик яратиш, ҳамда қўшимча пул тушумини ошириш мақсадида уч ва ундан юқори тоифали меҳмонхоналарда миллий ҳунармандчилик маҳсулотлари сотиладиган дўконлар ва савдо шохобчаларини ташкил қилиш талаби ҳам жорий этилган.
Таъкидланишича, «Туризм хизматлари. Жойлаштириш воситалари. Умумий талаблар» давлат стандартига киритилган ўзгартиришлар 2021 йил 3 июлдан, «Туризм хизматлари. Меҳмонхоналар ва ўхшаш жойлаштириш воситалари. Таснифлаш тизими» давлат стандартига киритилган ўзгартиришлар эса 2021 йил 30 июндан амалга киритилган.
Хабарга кўра, тадбиркорлик субъектлари жойлаштириш воситаларини давлат стандартлари талабларига мувофиқлаштириш лозим. Мазкур талабларнинг бажарилиши сертификатлаштириш объектларида ўтказиладиган навбатдаги инспекция назорати давомида стандартга мувофиқ киритилган ўзгартиришлар бўйича дастурга асосан текширилади.
Жумладан, 2022 йилнинг дастлабки ҳафтасида 7 та жойлаштириш хизматини кўрсатиш объектларида сертификатлаштириш аудитлари ўтказилган. Уларнинг натижаларига кўра, 6 та меҳмонхона хизматларини кўрсатиш объектларида электрон дастур билан интеграциялашган электрон калитли (пластик магнит карта) қулфлар ва ногиронлар учун махсус хона ташкил этилмагани сабабли сертификатлаштириш бўйича рад жавоби берилган.
Аввалроқ Ўзбекистонда авиаюклар ташувини электрон расмийлаштириш учун «е-Freight» халқаро стандарти жорий этилиши хабар қилинганди.