АҚШнинг NASA (Миллий аеронавтика ва коинотни тадқиқ қилиш бошқармаси) ташкилоти 2016 йилда Принстон университетига одамлар ўзга сайёраликлар топилишига қандай муносабатда бўлишини ўрганиш учун 1,1 миллион доллар грант ажратгани маълум бўлди. Бу ҳақда The Times UK нашри хабар берди.

Қайд этилишича, университетнинг илоҳий тадқиқотлар маркази бу масалани 2015 йилдан 2017 йилгача ўрганган.

Тадқиқотда Кембриж университетидан воиз ва доктор Эндрю Дэвисон иштирок этган. Дэвисоннинг ихтисослиги астробиология ва христианлик ўртасидаги муносабатлардир. У жаҳон динлари вакилларининг ўзга сайёраликларга эҳтимолий муносабатини ўрганган 24 экспертдан бири эди.

Шундай қилиб, тадқиқотчилар бирон бир динга эътиқод қилмайдиганларга қараганда диндорлар Ердан ташқаридаги ҳаётнинг кашф этилишига кўпроқ тайёр эканини аниқлаган.

Дэвидсон ўзининг 2022 йилда нашр этилиши керак бўлган янги китобида эътиқод қилмайдиган инсонлар диндорлардан фарқли ўлароқ ўзга сайёраликларнинг топилишини муаммоли деб баҳолайди деб тушунтирган. Унинг қайд этишича, бундай кашфиёт амалга ошса, кўпчилик диний анъаналарга мурожаат қилади.

Хабарга кўра, бошқа экспертлар, жумладан, имом, раввин ва англикан черкови руҳонийлари, агар ўзга сайёраликлар топилса ҳам, бундан дин издошларининг эътиқодлари мустаҳкамланишини айтган.

Илоҳий тадқиқотлар маркази директори Уилл Сторрарнинг айтишича, NASA бошқа сайёрада ҳаётни кашф қилиш оқибатлари бўйича жиддий экспертизани ривожлантиришдан манфаатдор.

NASA тадқиқоти ҳақидаги янгилик Жеймс Уебб космик телескопи ишга туширилиши фонида пайдо бўлди. Телескоп потенциал яшашга яроқли экзосайёраларни ва ердан ташқаридаги ҳаётни излайди, шунингдек, коинот шаклланишининг дастлабки босқичида содир бўлган жараёнларни ўрганади.

Аввалроқ NASA Жефф Безоснинг космик компанияси билан шартнома имзолагани хабар қилинганди.