Қозоғистонда суюлтирилган газ сотувчи 180 нафар тадбиркорга нисбатан тергов бошланди. Бу ҳақда «Интерфакс» хабар берди.

Қайд этилишича, Қозоғистон Рақобатни ҳимоя қилиш ва ривожлантириш агентлиги суюлтирилган нефть газининг чакана савдоси билан шуғулланувчи 180 нафар тадбиркорга нисбатан тергов бошланганини маълум қилди.

«Улардан 85 нафари Манғистов, 14 нафари Қарағанда, 22 нафари Атрау, 22 нафари Оқмўла, 12 нафари Қизилўрда вилоятларида, 4 нафари Нурсултонда, 5 нафари Чимкентда, 4 нафари Қўстанай вилоятида, 4 нафари Шимолий Қозоғистон вилоятида, 5 нафари Туркистон, 2 нафари Жамбил ва 1 нафари Олмаота вилоятларида», дейилган хабарда.

Маълум қилинишича, барча ҳудудларда суюлтирилган газ нархини белгилаш ва сақлашда тил бириктириш бўйича аксилмонопол текширувлар бошланган. Аввалроқ суюлтирилган газни сотувчи Қозоғистоннинг 6 та компаниясига нисбатан суриштирув ўтказилаётгани ҳақида хабар берилган, улар нархни асоссиз ошириб юборганликда гумон қилинмоқда.

Маълумот ўрнида, 2 январь куни Қозоғистон ғарбидаги Жанаўзен шаҳрида суюлтирилган газ нархи икки баравар ошишига қарши митинглар бошланганди. Намойишлар тезда бутун мамлакат бўйлаб тарқалиб, сиёсий тус олган, аммо кейин тартибсизликлар, хавфсизлик ходимлари билан тўқнашувлар ва талончиликка айланиб кетган.

Бундан ташқари, 5 январь куни президент ҳукуматни ва алоҳида хавфсизлик ходимларини ишдан бўшатиб, биринчи президент Нурсултон Назарбоев ўрнига Қозоғистон Хавфсизлик кенгаши раиси лавозимини олган. Газ нархини ошириш вақтинча бекор қилинган. Мамлакатда фавқулодда ҳолат жорий этилиб, интернет ва мобил алоқа ўчирилган ва барча банклар иши тўхтатилган.

Шунингдек, Коллектив хавфсизлик шартномаси ташкилоти (КХШТ)нинг Коллектив хавфсизлик кенгашидан Қозоғистонга тинчликпарвар кучлар юборилган.

Аввалроқ Қозоғистонда тартибсизликлар туфайли бизнес кўрган зарар қанчага етгани маълум бўлганди.