Дунёнинг энг йирик криптовалюта биржаси Binance Forbes журнали нашриётига 200 миллион доллар сармоя киритмоқда. Бу ҳақда CNBC хабар берди.

Маълумотларга кўра, Binance Forbes’га Web3 стратегияси ва рақамли ташаббуслар бўйича маслаҳат беради. Binance’нинг мулоқотлар бўйича директори Патрик Ҳиллманн ва Binance Labs бош директори Билл Чин Forbes директорлар кенгашига қўшилади.

Биржанинг таъкидлашича, Forbes’га сармоя киритиш — биринчи навбатда медиа индустриясига молиявий сармоя киритишни англатади: Binance Web3’нинг журналистика ва нашриётнинг келажагида медиа секторига жиддий таъсир кўрсатган Web2’дан кам бўлмаган муҳим роль ўйнашига ишонади.

«Forbes — рақамли активларнинг ривожланаётган дунёсига қизиққан одамлар биргаликдаги саъй-ҳаракатларимиз орқали ушбу соҳада ҳақиқий етакчига айланиши мумкин бўлган жой эканига қатъий ишонамиз», — дея қўшимча қилган Binance вакили.

Унинг қайд этишича, Forbes’нинг таҳририят мустақиллиги бузилмайди ва савдо майдончасидан бутунлай мустақил бўлиб қолади.

Forbes бош директори Майк Федерле, ўз навбатида, нашр блокчейн ва янги рақамли активлар ҳақида фойдали маълумотларни тақдим этишга интилаётганини таъкидлаган.

«Binance сармояси билан биз дунёнинг етакчи криптовалюта биржаси тажриба ва ресурслари ҳамда энг муваффақиятли блокчейн инноваторларидан бирига эгамиз», — деган Федерле рақамли активлар дунёсига қизиққан одамларнинг ёрдами билан Forbes бу соҳада етакчига айланиши мумкинлигини қўшимча қилган ҳолда.

CNBC манбаларига кўра, бундай инвестиция миқдори Binance’ни глобал Forbes’нинг иккита энг йирик акциядорларидан бирига айлантиради. 2014 йилда Ҳонконгнинг Integrated Whale Media компанияси Forbes Media акцияларининг асосий қисмини сотиб олганди.

Қайд этилишича, сармоя нашриётга келажакда бирлашиш учун махсус яратилган ва фонд бозорида рўйхатга олинган SPAC компанияси Magnum Opus Acquisition билан қўшилиш орқали жамоатчиликка чиқиш режасини амалга оширишга ёрдам беради. Forbes 2021 йилнинг август ойида биржага кириш режаларини эълон қилганди. Бирлашган компаниянинг тахминий қиймати 630 миллион долларга баҳоланган.

Аввалроқ Қозоғистонлик миллионер Forbes журналига ўзи ҳақида рухсатсиз ёзишни тақиқлагани хабар қилинганди. Шунингдек, Forbes Ўзбекистонни 2022 йилда саёҳат қилиш учун энг яхши 50 та манзил рўйхатига киритгани ҳақида хабар берилди.