Satellite Vu компаниясининг сунъий йўлдошлари Ердаги иссиқлик оқимини аниқлашга ёрдам беради. Бу ҳақда The Guardian хабар берди.

Маълум қилинишича, Британиянинг Satellite Vu сунъий йўлдош компанияси Space X’нинг Falcon 9 ракетаси ёрдамида Ердаги иссиқлик оқимини аниқлашга қодир махсус сунъий йўлдошларининг биринчи партиясини орбитага чиқаради.

Ушбу Британия-Америка лойиҳаси уйлар ёки корхоналардаги кераксиз иссиқлик оқимларини бартараф этиш орқали нафақат Ердаги объектларнинг энергия самарадорлигини ошириш, балки глобал исишга қарши курашиш учун ҳам мўлжалланган.

Таъкидланишича, сунъий йўлдошлар юқори аниқликдаги ва ўта сезгир инфрақизил датчиклар билан жиҳозланган бўлиб, улар ёрдамида Ернинг турли минтақаларидаги иссиқлик оқишини харитага тушириш мумкин бўлади. Ушбу оқимларни топиш қурилиш дизайнини яхшилаш ва энергияни тежашга ҳам ёрдам беради.

Бундай сунъий йўлдошларнинг навбатдаги партияси яқин икки-уч йил ичида орбитага юборилади ва эҳтимол, ҳозирда Корнуолл ва Шетланд оролларида қурилаётган Британия космодромларидан учирилиши мумкин. Ушбу лойиҳа учун Satellite Vu 20 миллион фунт стерлингга яқин венчур капитал инвестицияларини жалб қилган ҳамда Британия космик агентлиги ва Европа космик агентлигидан грантлар олган.

Аввалроқ Маскнинг SpaceX компанияси Тонга Қироллигига 50 та сунъий йўлдош станцияларини совға қилгани ҳақида хабар берилди. Шунингдек, Маскнинг сунъий йўлдошлари хавфли астероидларни ўрганишга халақит бера бошлагани ҳақида хабар берилди.