«Промсвязьбанк»нинг иловалари App Store’дан олиб ташланди. Бу ҳақда РБК ёзмоқда.

Қайд этилишича, Apple’нинг ушбу ҳаракати 23 февраль куни АҚШ Россиянинг Донецк ва Луганск мустақиллигини тан олиши сабабли «Промсвязьбанк»га қарши блокловчи санкциялар жорий қилгани билан боғлиқ.

Маълум бўлишича, «Промсвязьбанк» App Store’да учта иловага эга эди — мобиль банкинг, «ПСБ Инвестиции» ва корпоратив мижозлар учун «ПСБ Бизнес». Улар 24 февраль куни App Store’дан ғойиб бўлган.

«Apple банк санкциялари туфайли иловаларни олиб ташлади», — дейди «Промсвязьбанк» вакили.

Унинг қўшимча қилишича, банкнинг Apple смартфонларида аввалдан ўрнатилган иловалари стандарт режимда ишлашда давом этмоқда ва барча функциялар мижозлар учун мавжуд.

Аввалроқ Америка Қўшма Штатлари Россиянинг Украинадаги ҳарбий ҳаракатларига қарши чоралар кўриш мақсадида «Сбербанк», «Газпромбанк», «Открытия» Банклари, «Совкомбанк», «Новикомбанк»га қарши санкциялар киритаётгани ҳамда ушбу чекловлар мамлакат банк секторининг 80 фоизини қамраб олиши хабар қилинганди.

Бундан ташқари, Европа Иттифоқи Россиянинг Шарқий Европада олиб бораётган ҳарбий ҳаракатлари фонида санкцияларнинг иккинчи пакетини эълон қилди. Унга кўра, янги чекловлар Россия банк бозори ва муҳим давлат компанияларининг 70 фоизига таъсир қилади, нефтни қайта ишлаш заводларини модернизация қилишни ва самолёт қисмларини етказиб беришни тўхтатади.