«Яндекс» АҚШда ҳайдовчисиз автомобилларни синовдан ўтказишни тўхтатди. Бу ҳақда «РБК» хабар берди.

Маълум қилинишича, Россиянинг «Яндекс» компанияси АҚШнинг Энн-Арбор шаҳрида ҳайдовчисиз автомобилларнинг йўл синовларини вақтинча тўхтатган.

«Яндекс» 2020 йил сентябрида ҳайдовчисиз автомобиллар йўналишини алоҳида компания — Yandex Self-Driving Group’га ажратганди. Август ойида эса «Яндекс» компанияси Мичиган штатининг Энн-Арбор шаҳрида ҳайдовчисиз автомобилларни синовдан ўтказишни бошлаган эди. Россиядан ташқаридаги яна бир синов зонаси Исроилдаги Тел-Авивдир.

Шунингдек, «Яндекс» 2021 йилдан бери ишлаётган АҚШнинг Grubhub озиқ-овқат етказиб бериш платформаси билан ҳамкорликни тўхтатди. «Яндекс.Ровери» буюртмаларни Америка коллежлари ва университетлари кампусларига етказиб берарди.

«Университет кампусларидан етказиб берувчи роботлар биз ҳозирда жойлашган бўлган ёки етказиб беришни йўлга қўймоқчи бўлган бошқа нуқталарга [мамлакатларга] кўчирилади», дея маълум қилган компания матбуот хизмати.

Ҳамкорлик лойиҳаларнинг узилишига Россиянинг Украинага бостириб кириши сабаб бўлди. АҚШ, Япония ва Европа Иттифоқи давлатлари Россияга қарши санкциялар киритди, кўплаб хорижий компаниялар, жумладан Microsoft, Cisco ва бошқалар мамлакатда фаолиятини қисман ёки тўлиқ тўхтатди.

Аввалроқ «Яндекс» акциядорларини дефолт хавфидан огоҳлантиргани хабар қилинганди. Шунингдек, «Яндекс» раҳбари Аркадий Волож миллиардер мақомидан маҳрум бўлгани ҳақида хабар берилди.