Марказий банк бошқарувининг 2022 йил 21 июлдаги йиғилишида юзага келаётган инфляцион жараёнлар, тартибга солинадиган нархлар оширилишининг кейинга қолдирилиши билан бир қаторда мавжуд ноаниқликлар ва хатарларни инобатга олган ҳолда йил якуни бўйича инфляция даражаси 12-14 фоизлик коридорнинг қуйи чегараси атрофида шаклланиши прогноз қилинаётгани таъкидланганди.

Энергетика вазири ўринбосари Шерзод Хўжаев Kommers.uz билан суҳбатда Марказий банкнинг инфляция бўйича прогнозларига таяниб, энергетика тарифлари бу йил оширилмаслигини айтиш хато эканини айтди.

Вазир ўринбосарининг таъкидлашича, 2022 йилнинг иккинчи ярмидан тарифларни ўзгартириш бўйича қарорни қайта кучга киритиш режалаштирилган.

«Марказий банкнинг баёнотини ўқиганимда, мен тарифлар оширилмайди эмас, ‘бизнинг прогнозларимизда энергетика тарифларининг оширилиши инобатга олинмаган, агар тарифлар ошса, инфляция бундан юқорироқ бўлади’, деган мазмунни тушундим. Яъни, бу тарифлар оширилмайди, деган сигнал эмас.

Марказий банк тарифларнинг оширилиши ёки оширилмаслиги бўйича қарор қабул қилувчи орган эмас. Бу нарса идоралараро тариф комиссиясининг қарори билан бўлади», — деди Шерзод Хўжаев.

Суҳбатни тўлиқ қуйида томоша қилишингиз мумкин:

Аввалроқ Шерзод Хўжаев Kommers.uz’га берган интервьюсида қишда электр энергияси таъминотига чекловлар киритилишининг сабабини тушунтиргани хабар қилинганди.