Президентнинг кичик ва ўрта бизнеснинг иқтисодиётдаги ўрнини ошириш чора-тадбирлари тўғрисидаги фармони қабул қилинди.

Унга кўра, 2025 йилда кичик ва ўрта бизнесни ривожлантиришнинг асосий мақсадли кўрсаткичлари этиб қуйидагилар белгиланди.

Жумладан:

• кичик ва ўрта бизнеснинг ялпи ички маҳсулотдаги улушини 55 фоизга, саноатда — 34 фоизга, экспортда — 34 фоизга ва аҳоли бандлигини таъминлашда 75 фоизга етказиш;
• камида 600 нафар кичик ва ўрта бизнес субъектларининг йириклашишига кўмаклашиш орқали уларни «чемпион» тадбиркорларга айлантириш;
• 100 нафардан кўп ишчиси бор тадбиркорлик субъектлари сонини 4 мингга етказиш.

2025 йил 1 майдан ўзини ўзи банд қилган шахслар ЯТТ ёки юридик шахс сифатида давлат рўйхатидан ўтказилганда, давлат божи ундирилмайди.

Шунингдек, ўз фаолиятини тегишинча ЯТТ, микрофирма ёки кичик корхона тоифасигача йириклаштирган ўзини ўзи банд қилган шахслар ва тадбиркорларга Оилавий тадбиркорликни ривожлантириш дастури доирасида 50 млн сўмгача, Кичик бизнесни узлуксиз қўллаб-қувватлаш комплекс дастури доирасида — 150 млн сўмгача гаровсиз кредитлар берилади.

Ўз фаолиятини тегишинча ўрта ёки йирик бизнес тоифасигача йириклаштирган тадбиркорларга 1йил давомида ҚҚС суммаси ўрнини қоплаш (қайтариш) 7 кун муддатда тезлаштирилган тартибда амалга оширилади.

Бундан ташқари, фармон билан «Чемпион» тадбиркорлар рўйхатига киритиш мезонлари белгиланди.

Фармонга кўра, Қорақалпоғистон Республикасида 2025 йил 1 июлга қадар юридик шахсларга онлайн режимда микрокредит ажратиш жараёнларини соддалаштириш ва уларни тезкор тасдиқлаш механизмлари йўлга қўйилади.

Кичик бизнесни узлуксиз қўллаб-қувватлаш комплекс дастури доирасида Ижтимоий ҳимоя ягона реестрида турган ишсиз фуқароларни иш билан таъминлаган кичик ва ўрта бизнес субъектларига ушбу фуқаролар учун кредит берилади.

Бунда ташкил қилинган ҳар бир иш ўрнига қўшимча равишда 10 млн сўмдан, 10 ва ундан кўп бундай иш ўринларини ташкил қилган субъектларга 100 млн сўмгача уч йилгача муддатга йиллик 14 фоиз ставкада айланма маблағларни тўлдириш учун кредит ажратилади.

Дастур доирасида «чемпион» тадбиркорларга айлантириладиган ташкилотлар рўйхати шакллантирилиб, унга қуйидаги мезонларга жавоб берадиган тадбиркорлик субъектлари киритилади.

• туман (шаҳар) даражасида — ҳар бир туман (шаҳар)да камида 2 тадан йиллик айланмаси 10 млрд сўмдан юқори бўлган ва 50 тадан ортиқ иш ўрни яратган тадбиркорлик субъектлари;
• Қорақалпоғистон Республикаси, вилоятлар ва Тошкент шаҳрида — ҳар бир ҳудудда камида 5 тадан йиллик айланмаси 100 млрд сўмдан юқори бўлган ва 500 тадан ортиқ иш ўрни яратган тадбиркорлик субъектлари;
• республика даражасида — йиллик айланмаси 1 трлн сўмдан юқори бўлган ва 5 мингдан ортиқ иш ўрнини яратган тадбиркорлик субъектлари.