Ўзбекистон аҳолиси 2026 йилнинг январь—июнь ойларида тижорат банкларига жами 12,3 миллиард доллар сотди. Марказий банк маълумотларига кўра, бу кўрсаткич 2025 йилнинг мос даврига нисбатан деярли 1,4 баробарга ошган.

Шу билан бирга, аҳоли ушбу даврда 6,8 миллиард доллар сотиб олган — бу ҳам ўтган йилнинг январь—июнь ойларидаги 5,4 миллиард долларга қараганда 26 фоизга кўп.

Статистикага кўра, ушбу даврда жисмоний шахсларнинг валюта таклифи талабдан 5,5 миллиард долларга ортиқ бўлди: бу ички валюта бозорида қўшимча таклиф манбайига айланди.

Халқаро пул ўтказмалари орқали мамлакатга 2026 йилнинг биринчи ярим йиллигида 9,3 миллиард доллар кириб келган, 1,3 миллиард доллар эса четга чиқиб кетган. Натижада 8 миллиард долларлик ижобий салдо шаклланган.

Йил бошидан бери ички валюта бозорида хорижий валютага бўлган умумий талаб 32 миллиард долларга яқин бўлиб, бир йил олдингига нисбатан 20 фоизга ошган. Валюта таклифи 27,8 миллиард долларни ташкил этиб, 31 фоизга ўсган: таклиф талабдан тезроқ суръатларда кўпаяётганини кузатиш мумкин.

Бу эса миллий валюта курсининг нисбатан барқарор сақланишига ёрдам берган: доллар курси 2026 йилнинг январь-июнь ойларида 11 935 – 12 320 сўм оралиғида тебраниб, давр якунида 12 009 сўм/долларни ташкил этди — бу йил бошидаги кўрсаткичдан деярли фарқ қилмайди.

Халқаро валюта жамғармаси жорий йил июнь ойидаги ҳисоботида Ўзбекистоннинг алмашув курси режимини қайта баҳолаб, мамлакатни “судралувчи”дан “сузувчи” курс режимига эга давлатлар қаторига ўтказди. Бундай мақомга Жанубий Корея, Қозоғистон, Туркия каби 33 та давлат эга.