Президент раислигида ҳудуд ва тармоқларда иқтисодий ўсиш суръатларини таъминлаш бўйича биринчи ярим йиллик таҳлили ҳамда йил якунига қадар устувор вазифалар юзасидан видеоселектор йиғилиши ўтказилди. Йил бошидан 57 та тармоқ ва 76 та ҳудудий корхона ишлаб чиқаришни 11 трлн сўмга камайтиргани қайд этилди.

Бош вазир ўринбосарига вилоят ҳокимлари ва тармоқ раҳбарлари билан ўн кунда «корхонабай» таҳлил ўтказиш топширилди. Ҳар бир корхонада қандай муаммо бўлса, шу жойнинг ўзида ҳал этилади.

Саноат кенгашига 133 та корхонада йўқотилган 11 трлн сўмлик ишлаб чиқаришни қоплаш бўйича таклиф киритиш вазифаси қўйилди.

Шунингдек, ҳозир 22 трлн сўмлик 3 мингта давлат объекти аукционда тургани айтилди. Ҳокимларда давлат мулкларини сотиш бўйича тизим йўқлиги танқид қилинди.

Яқинда янги хусусийлаштириш дастури бошланади. Унга кўра, 100 трлн сўмлик 1,3 мингта кўчмас мулк, 8 минг гектар ер майдони ва 66 та корхонадаги давлат улушлари савдога чиқарилади.

Давлат активини олган тадбиркор учун аванс тўлови 30% дан 15% га камайтирилади. Қолган суммани фоизсиз бўлиб тўлаш имконияти берилади.

Ҳозир банклар балансида 9,3 трлн сўмлик 2 411 та мол-мулк сотилмай турибди.

Ҳар бир объектнинг банк балансида асосли тургани таҳлил қилинади. Харидори бор, лекин сунъий ушлаб турилган объектлар бўйича қонун устуворлиги таъминланади.

Айрим ҳудудларда импорт экспортдан тезроқ ўсиб бораётгани ҳам танқид қилинди. Ўтган йили импорт экспортга нисбатан Тошкент вилоятида $1,9 млрдга, Самарқандда $1,4 млрдга кўп бўлган.

Андижонда бу фарқ $866 млн, Жиззахда $792 млн, Бухорода $662 млнни ташкил этган.

Давлат раҳбари ҳар бир ҳоким бундай ҳолатни чуқур ўрганиши ва импорт ўрнини босувчи ҳамда экспортбоп ишлаб чиқаришни кўпайтириш бўйича аниқ чора кўриши шартлигини таъкидлади.