Тошкентда уй-жой учун субсидия суммасини ошириш таклиф этилмоқда
Пойтахт ҳокимлиги субсидия миқдори аҳоли эҳтиёжини тўлиқ қопламаётгани, шунинг учун шартларни қайта кўриб чиқиш бўйича таклифлар ишлаб чиқилаётганини маълум қилди.
Тошкент шаҳрида ипотека кредитлари учун субсидия миқдорини ошириш таклиф этилмоқда. Бу ҳақда 23 сентябрь куни бўлиб ўтган халқ депутатлари шаҳар кенгашининг навбатдаги йиғилишида пойтахт ҳокимининг биринчи ўринбосари Бахтиёр Хайдаров маълум қилди.
Жорий йилнинг 1 сентябр ҳолатига кўра, Тошкент шаҳрида субсидия дастури доирасида 15 978 нафар фуқародан ариза келиб тушган. Туман комиссиялари томонидан кўриб чиқилган аризалардан 2 479 таси бўйича ижобий хулоса берилди. Натижада, 388 нафар фуқарога жами 11,64 млрд сўм миқдорида субсидия маблағлари ажратилди.
Бахтиёр Хайдаровнинг сўзларига кўра, 2016 йилгача пойтахтда йилига ўртача 2,5−3 минг хонадон фойдаланишга топширилган бўлса, 2016 йилдан буён бу кўрсаткич йилига 12−13 минг хонадонга етган. Жорий йилда эса бу рақамни 20 минггача ошириш режалаштирилмоқда.
Бундан ташқари, у субсидия дастури доирасида Тошкент шаҳрида белгиланган имтиёзлар уй-жой нархлари юқорилиги сабабли аҳолининг эҳтиёжларини тўлиқ қопламаётгани таъкидлади.
«Субсидия олишга мурожаат қилган аҳолининг атиги олтидан бир қисмига маблағ берилган холос. Бунинг асосий сабаби, дастур доирасида Тошкент шаҳрида 440 млн сўмгача кредит ва бошланғич тўлов учун 30 млн сўм маблағ ажратилади. Лекин 550−700 млн сўм атрофидаги уй-жойларни сотиб олиш имконияти жуда чекланган. Тошкентда бундай нархдаги уйларни олиш жуда қийин», — деди Хайдаров.
Унинг таъкидлашича, хорижий тажриба, жумладан Сингапур ва бошқа мамлакатларда ипотека субсидиялари миқдори пойтахт ҳудудларида нисбатан юқори белгиланади, шунингдек, уларда муқобил уй-жой таъминоти механизмлари жорий этилган. Бахтиёр Хайдаров ушбу ўрганишлар натижасида Тошкент шаҳар ҳокимлиги Иқтисодиёт ва молия вазирлигига тегишли таклифларни киритаётганини маълум қилди.
