Жорий йилнинг тўққиз ойида Ўзбекистонда кузатилмайдиган иқтисодиёт ҳажми бироз ошди. Бу ҳақда Миллий статистика қўмитаси ҳисоботида келтирилган.

Январь-сентябрь ойлари якунларига кўра, мамлакатнинг ялпи ички маҳсулоти ҳажми 1,3 квадриллион сўм ($108,73 млрд) дан ортиқни, реал ўсиш суръати эса 7,6% ни ташкил этди. Ўсиш суръати 2021 йилдан бери энг юқори даражада қолмоқда.

Кузатилмайдиган иқтисодиётнинг ялпи қўшилган қиймати ҳажми 433,68 трлн сўмни ($36,17 млрд атрофида) ташкил этди. Унинг ялпи ички маҳсулотдаги улуши биринчи ярим йилликдаги 32,9% дан 33,3% гача ошди.

Бунда, кузатилмайдиган иқтисодиёт норасмий ва яширин иқтисодиётга бўлинади. Норасмий иқтисодиёт — уй хўжаликлари ва жисмоний шахслар фаолияти ҳажми 333,82 трлн сўмни ёки ЯИМнинг 25,6% ини ташкил этди. Яширин иқтисодиёт эса 99,86 трлн сўмга (7,7%) баҳоланмоқда. Дастлабки олти ойга нисбатан норасмий сектор улуши ошди, яширин сектор улуши эса камайди.

Уй хўжаликлари ва жисмоний шахслар фаолияти ҳамда яширин иқтисодиёт ҳажмининг тармоқлар бўйича таркибида қишлоқ, ўрмон ва балиқчилик хўжалиги етакчилик қилди — жами ҳажмнинг 69,4%и.

Ундан кейинги ўринларда хизматлар соҳаси (36,2%), қурилиш (35%) ва турибди. Шунингдек, саноат таркибида кузатилмайдиган иқтисодиёт ҳажми 10,2% ни ташкил этди.

Январь-сентябрь ойларида Ўзбекистонда солиқ тушумлари яширин иқтисодиёт камайиши ҳисобига 27% га ошди. Кэшбек ва рақамли ечимлар орқали норасмий секторнинг 10−20% қисми қонуний иқтисодиётга қўшилди.