2025 йил январь—сентябрь ойларида Ўзбекистон бюджетига 158 трлн сўмдан ортиқ солиқ ундирилди. Бу 2024 йил мос даврига нисбатан 18 фоизга кўп.

Солиқ қўмитаси таҳлилига кўра, жорий тушумларнинг 67,9 трлн сўмини ишлаб чиқариш корхоналари тўлаган. Мазкур тармоқнинг 2024 йил мос давридаги солиқ тўлови 33 трлн сўм бўлган. Яъни тушумлар бир йилда қарийб икки баравар ўсган.

Жорий йил 9 ойида ишлаб чиқариш билан шуғулланувчи 20 та корхона солиқларнинг 14,1 трлн сўмини тўлаган. 2024 йил мос даврида улардан 13,9 трлн сўм ундирилганди.

Тушумлар сезиларли ортишида қатор корхоналар кўпроқ солиқ тўлай бошлагани муҳим омил бўлган. Мисол учун, топ-20 талик ишлаб чиқарувчи корхоналар орасида “Таллимаржон ИЭС” АЖ 2025 йил январь—сентябрь ойларида 1,29 трлн сўм солиқ тўлаган. Таққослаш учун, 2024 йил мос даврида бу кўрсаткич 215,8 млрд сўм бўлган. Яъни бир йиллик солиқ тўловлари қарийб олти баробарга ўсган.

Шу билан бирга, Coca-Cola Uzbekistan жорий йил 9 ойида 736,6 млрд сўм солиқ тўлаган бўлса, бу рақам ўтган йил мос даврида 456,3 млрд сўмни ташкил этганди. Йиллик ўсиш — 61,4 фоиз. Топ-20 таликдаги бошқа аксар корхоналар солиқ тўловларида ҳам ўсиш кузатилган.

Рақамлардан айрим давлат корхоналари ўтган йилгига нисбатан сезиларли даражада кам солиқ тўлаганини кўриш мумкин. Масалан, UzAutoMotors АЖ 2025 йил январь—сентябрь ойларида 1,36 трлн сўм солиқ тўлаган. 2024 йил мос даврида эса 2,38 трлн сўмлик солиқ тўловини амалга оширганди. Бир йил мобайнида компаниядан 1 трлн сўмга кам солиқ ундирилган (қисқариш 42,6 фоиз).

“Ўзбекнефтгаз” АЖ 9 ой ичида 2,66 трлн сўм, ўтган йил мос даврида 3,18 трлн сўм солиқ тўлаган. Йиллик қисқариш — 520 млрд сўм (16,3 фоиз). Бироқ компания топ-20 талик солиқ тўловчилар ичида биринчиликни эгаллаган.

“Навоийазот” АЖ жорий йил 9 ойида 517,3 млрд сўм, ўтган йил мос даврида 683,2 млрд сўм солиқ тўлаган. Қисқариш — 24,3 фоиз.

Солиқ қўмитаси изоҳига кўра, рўйхатга Ўзбекистон иқтисодиётининг энг йирик саноат корхоналари  — Навоий ва Олмалиқ кон-металларугия комбинатлари киритилмаган.