Ўзбекистон Инновацион ривожланиш вазирлиги ҳузуридаги Яшнобод  инновацион технопарки  «Бизнес-инкубатор» дастурини эълон қилди. Бу ҳақда вазирлик матбуот хизмати хабар берди.

Маълум қилинишича, дастурда 18 ёшдан кичик бўлмаган ташаббускор ёшлар, талабалар,  тадбиркорлар ва илмий ходимлар қатнашишлари мумкин. Уч ой давом этадиган дастур қатнашчилари ўз илмий ғояларини бизнес моделга айлантириш ва ҳаётга татбиқ қилиш, инвесторлар билан ишлаш бўйича амалий машғулотлар олади.

Қайд этилишича, машғулотлар Ўзбекистоннинг етакчи маҳаллий ва халқаро мутахассислари томонидан олиб борилади, қатнашчиларга тажрибали бизнес-устозлар бириктирилади. Шунингдек, дастур маркетинг бошқаруви, молиявий бошқарув, бизнес операциялар, рақамлаштириш ва электрон платформалардан самарали фойдаланиш, ҳуқуқий саводхонлик ва солиқчиликка оид мавзуларни ўз ичига олади.

Таъкидланишича, дастур сўнгида «Демо-кун» тадбири ўтказилади. Унда иштирокчилар ўз лойиҳалари ҳамда бизнес режаларини инвесторларга тақдим қилишлари мумкин бўлади. Аризалар 18 ноябргача yait.uz сайтида қабул килинади.

Аввлроқ IT Park соврин жамғармаси 55 минг доллар бўлган танлов эълон қилгани ҳақида хабар берилганди. Шунингдек, Uzcard подкастерлар учун бизнес-инкубатор дастурини ишга тушириши маълум қилинди.