Тошкент шаҳрида 8 ноябрь куни Ўзбекистон бош вазирининг ўринбосари — инвестициялар ва ташқи савдо вазири Сардор Умурзоқов Австриянинг Европа ва ташқи ишлар федерал вазири Михаэль Линхарт билан учрашди. Бу ҳақда Инвестициялар ва ташқи савдо вазирлиги матбуот хизмати хабар берди.

Маълум қилинишича, мулоқот чоғида Ўзбекистон-Австрия муносабатларининг муҳим масалалари, жумладан, сиёсий, савдо-иқтисодий, маданий-гуманитар соҳалардаги ҳамкорликнинг бугунги ҳолати ва уни кенгайтириш истиқболлари юзасидан фикр алмашилган.

Хусусан, Инвестициявий ҳамкорликни кенгайтириш масалалари муҳокама қилинган. Томонлар ўзбек ва австриялик тадбиркорлар ўртасида шериклик муносабатларини ўрнатиш ва қўшма инвестиция лойиҳалари сонини ошириш учун энг қулай шарт-шароитлар яратиш мақсадида яқиндан ҳамкорлик қилишга келишиб олган.

Қайд этилишича, икки томонлама савдо ҳажмини ошириш имкониятлари кўриб чиқилган. 2020 йил якунларига кўра, Ўзбекистон-Австрия товар айланмасининг ўсиши 2019 йилга нисбатан 53,6 фоизни ташкил этган. Бу борадаги ишларни янада фаоллаштиришга ўзаро қизиқиш билдирилган.

Шунингдек, Ўзбекистонни Европа Иттифоқининг «GSP+» преференциялар бош тизими бенефициари мақомини олишда қўллаб-қувватлагани учун Австрия томонига миннатдорчилик билдирилган. Ўзаро савдони кенгайтириш учун очилаётган ушбу имкониятлардан келиб чиққан ҳолда янги муносабатларни ўрнатиш мақсадида икки мамлакат ишбилармон доираларини яқинлаштириш бўйича келгусида ҳамкорлик қилиш шакллари белгиланган.

Учрашув якунида кўриб чиқилган ҳамкорлик йўналишлари доирасида ҳамкорликни фаол давом эттиришга келишилган.

Аввалроқ Европа комиссияси Ўзбекистонга 83 миллион евролик грантлар ажратиши хабар қилинганди. Шунингдек, Молия вазири ўринбосари Европа Иттифоқи делегацияси билан учрашгани ҳақида хабар берилди.